Astanada sot sanktsııasymen bes aıda 434 adam qamaýǵa alyndy
ASTANA. QazAqparat - Astananyń mamandandyrylǵan aýdanaralyq tergeý soty qyzmetke kirisken bes aıda 4,5 myńǵa jýyq shaǵym men materıaldy qaraǵan. Bul týraly qalalyq sottyń baspasóz qyzmetinen málim etti, dep habarlaıdy QazAqparat.
«Astananyń mamandandyrylǵan aýdanaralyq tergeý soty qyzmetin 2018 jyldyń 31 shildesinde bastaǵan bolatyn. Osy ýaqytta 5 sýdıa 4 491 shaǵym jáne materıaldy qarap úlgerdi. Osy kezeń barysynda qylmystyq protsess qatysýshylary bergen aryz-shaǵymdardyń 35% qanaǵattandyrylyp (2016-2017 jyldary - 18%), 35 jeke qaýly shyǵaryldy», - delingen aqparatta.
Sot tóraǵasy Narıman Beknazarovtyń aıtýynsha, sot baqylaýy sot júıesi qyzmetiniń jańa formasy bolyp tabylady: buzylǵan quqyqtar qalpyna keltirilip, olardyń aldyn alý úshin áreket etý sharalary qabyldanady.
Málim etilgendeı, sot bes aıda 434 adamdy qamaýǵa alýǵa sanktsııa berip, 98-i (18,4 %) boıynsha ótinimderdi qanaǵattandyrýdan bas tartqan. Salystyrý úshin, 2018 jyldyń birinshi jartyjyldyǵynda 678 ótinish qaralyp, 622-si qanaǵattandyrylǵan, 56-sy qaıtarylǵan (8%). 2016 jyly 1 011 adamdy qamaýǵa alýǵa sanktsııa berilgen.
Qalyptasyp úlgergen tájirıbe kelip túsetin materıaldar sanyn azaıtýǵa septigin tıgizdi. Máselen, qylmystyq qýdalaý organdary qamaýda ustaý bultartpaý sharalaryn az qoldana bastady. Olardyń ornyna kepildikpen bosatý jáne úıqamaqqa alý sharalary qoldanylýda. Bes aıda 46 tulǵany kepildikpen bosatý, 48 adamdy úıqamaqta ustaý sanktsııalandy (2016 jyly kepildik - 3 jaǵdaıda, úıqamaq 47 jaǵdaıda qoldanyldy).
1 521 materıal boıynsha tintý, tárkileý, dúnıe-múlikke arest qoıý jáne taǵy basqa sharalarǵa sanktsııa berildi.
«Qylmystyq tekserý organdarynyń azamattardyń múlkine arest qoıý týraly bastamalarynyń jartysynan astamy - 49 materıal qaıtarylyp, 41-i qanaǵattandyryldy. 824 qupııa tergeý amaldaryna sanktsııa berilip, sonyń 14-ine qatysty jeke qaýly shyǵaryldy», - dep atap ótti sottan.
