Astanada sot salasy men BAQ ókilderi bas qosyp, ózara qarym-qatynas jaıyn ortaǵa saldy
ASTANA. Tamyzdyń 13-i. QazAqparat /Aıdar Osanalıev/ - Búgin Astanada Qazaqstannyń Sýdıalar odaǵy men Halyqaralyq «Ádil sóz» sóz bostandyǵyn qorǵaý qorynyń uıymdastyrýymen Turaqty jumys isteıtin «Sot bıligi men BAQ» forýmynyń kezekti otyrysy ótip jatyr.
Atalmysh shara AQSh-tyń demokratııalyq damý jónindegi agentiginiń qoldaýymen uıymdastyrylyp otyr. Otyrys barysynda Sýdıalar etıkasy jónindegi komıssııanyń jýrnalıster qaýymdastyǵymen baılanys jáne Sot reporterlary gıldııasynyń maqsat-mindetteri men qurylymyna qatysty máseleler talqylanbaq.
Otyrys barysynda kún tártibindegi máseleler jóninde sóz qozǵaǵan Qazaqstan Sýdıalar odaǵynyń tóraǵasy Vladımır Borısovtyń aıtýynsha, aqparat quraldary ókilderiniń kez kelgen máselede naqty ári múmkindiginshe obektıvti bolǵany durys. Sebebi elimizde az ǵana kemshilikterge bola bútindeı sot júıesine kúıe jaǵý áreketteri de ara - tura kezdesip otyrady. Osyǵan baılanysty sot ókilderi tarapynan keıbir aqparat quraldarynyń áreketterine shaǵymdanýshylar da bar.
Sondaı-aq Sýdıalar odaǵy tóraǵasynyń pikirinshe, Sot reporterlary gıldııasyn qurý - osy máselemen aınalysyp júrgen aqparat quraldary ókilderiniń kásibı biliktiligin arttyryp, olarǵa degen senimdi kúsheıtedi. Óz kezeginde bul jaǵdaı tilshilerdiń jumysyna qajetti múmkindikter jasaıdy.
Otyrys barysynda oǵan qatysýshylar kún tártibindegi osy jáne ózge de birqatar máseleler jóninde ózderiniń kózqarastaryn ortaǵa salyp, ózara pikir almasty.
