Astanada sot qyzmetin uıymdastyrý sapasy artty: byltyr ótinishterdiń sany eki esege azaıdy
ASTANA. KAZINFORM — Astana qalasynda Sot ákimshiliginiń departamenti 2025 jyldyń qorytyndysy boıynsha sot qyzmetin uıymdastyrý, sot praktıkasyn taldaý, sot aktilerin oryndaý jáne azamattarǵa kórsetiletin qyzmetterdiń sapasyn arttyrý baǵytynda naqty nátıjelerge qol jetkizdi. Bul týraly elorda ákimdigi málim etti.
Astana qalasy boıynsha Qazaqstan Respýblıkasy Sot ákimshiligi departamenti basshysynyń orynbasary Qanat Ospanov Kommýnıkatsııalar qyzmetinde ótken brıfıngte erejede naqty bekitilgen talaptarǵa sáıkes jáne qorytyndy keńesterdiń sheshimderi negizinde bıyldan bastap sot bólimderi sýdıalardyń basshylyǵy men baqylaýymen sot praktıkasyna júıeli túrde taldaý jáne qorytý júrgizýge mindettelgenin aıtty.
— 2025 jyldyń qorytyndysy boıynsha bólim tarapynan birqatar uıymdastyrýshylyq jáne ádistemelik jumys atqaryldy. Atap aıtqanda, 12 aı ishinde 5 keńeıtilgen plenarlyq otyrys, 10 jalpy jınalys, qalalyq sot bazasynda 5 dóńgelek ústel, 2 qorytyndy keńes jáne 15 apparattyq keńes ótkizýge praktıkalyq ári uıymdastyrýshylyq kómek kórsetildi, — deıdi ol.
Onyń sózinshe, bólim óz betinshe jáne sýdıalarmen birlesip 32 josparly taldaý men qorytý jumysyn júrgizgen. Sonymen qatar, 2025 jyly sýdıalarǵa arnalǵan 52 semınarlyq sabaq ótkizýge praktıkalyq jáne ádistemelik qoldaý kórsetilgen. Bul sabaqtardyń 12-si azamattyq ister boıynsha, 18-i ákimshilik ister, 11-i qylmystyq ister, taǵy 11-i ákimshilik quqyq buzýshylyq isteri jónindegi sottarǵa arnalǵan.
Sot aktilerin oryndaý baǵytynda da naqty sharalar qabyldanǵan.
— Atqarý paraqtaryn negizsiz qabyldamaý nemese qaıtarý, sondaı-aq qylmystyq aıyppuldy aýystyrýǵa qatysty usynymdardy ýaqytyly engizbeý faktileri boıynsha salystyryp tekserý júrgizý jóninde hattamalyq sheshim qabyldandy. Bul jumysqa Sot ákimshiligi departamenti, ádilet organdary, prokýratýra jáne jeke sot oryndaýshylary tartyldy, — dep atap ótti Qanat Ospanov.
Onyń málimetinshe, 2025 jyly sottar májbúrlep oryndaý úshin tikeleı joldaǵan 47 434 atqarý paraǵynyń 4 447-si nemese 9,4 paıyzy qabyldanbaǵan. Bul kórsetkish 2024 jylmen salystyrǵanda 3,3 paıyzǵa jaqsarǵan. Negizsiz qabyldanbaǵan atqarý paraqtary boıynsha kináli sot oryndaýshylaryn zańda belgilengen jaýapkershilikke tartý sharalary qoldanylǵan.
Halyqaralyq quqyqtyq kómek pen memlekettik qyzmet kórsetý salasynda da jumystar júrgizilgen. Atalǵan kezeńde bólimge shet memleketterden halyqaralyq quqyqtyq kómek kórsetý týraly 197 tapsyrma kelip túsken, al elorda sottary sheteldik sottarǵa 56 tapsyrma joldaǵan. Sondaı-aq sot organdarynan shyǵatyn resmı qujattarǵa apostıl qoıý jónindegi 128 ótinishtiń barlyǵy qanaǵattandyrylǵan.
— Ahýaldyq ortalyqtyń derekterine erekshe nazar aýdarylyp, protsestik merzimderdiń saqtalýyna kúndelikti monıtorıng júrgiziledi. 2024 jylmen salystyrǵanda buzýshylyqtar sany 3,9 paıyzǵa azaıyp, 171 fakti tirkeldi, — deıdi spıker.
Onyń ishinde protsestik merzimderdi saqtaý talaptaryn buzý — 81, sot aktilerin ýaqtyly engizbeý — 62, sot otyrystarynyń ýaqytyly bastalmaýy — 28 jaǵdaıdy quraǵan.
Anyqtalǵan buzýshylyqtar sýdıalar men sot qyzmetkerleriniń qatysýymen ótetin jedel keńesterde qaralyp, kináli tulǵalar zańnamaǵa sáıkes jaýapkershilikke tartylǵan. Sonymen qatar, departamentke kelip túsken ótinishter sany da aıtarlyqtaı azaıǵan. 2025 jyly 245 ótinish tirkelse, ótken jyly bul kórsetkish 558 bolǵan.
Taraptardy SMS arqyly habarlandyrý máselesinde de oń dınamıka baıqalady. 2025 jyly bul baǵytta 28 ǵana buzýshylyq anyqtalǵan, al bir jyl buryn olardyń sany 788 bolǵan. Sondaı-aq, sot otyrystaryn sebepsiz keıinge qaldyrý kórsetkishi de edáýir tómendep, jyldyń sońyna qaraı 802 jaǵdaıǵa deıin qysqarǵan.
— Jalpy alǵanda, qabyldanǵan sharalar sot qyzmetiniń ashyqtyǵyn arttyryp, protsestik tártipti nyǵaıtýǵa oń áserin tıgizip otyr, — dep túıindedi Qanat Ospanov.
Eske sala keteıik, buǵan deıin 2025 jyldyń atyshýly oqıǵalaryn jazdyq.
