Astanada sot ǵımaratynda múgedektigi bar áıel kótergishten qulap ketti: tekseris bastaldy

ASTANA. KAZINFORM – Astana qalasynyń azamattyq ister jónindegi aýdanaralyq soty ǵımaratynda múmkindigi shekteýli adamdarǵa arnalǵan kótergish qurylǵy isten shyǵyp, áıel adam jaraqat aldy, dep habarlaıdy agenttiktiń tilshisi.

Kýágerlerdiń aıtýynsha, kótergishpen joǵary kóterilip kele jatqan arbadaǵy áıel shamamen bir metr bıiktikten beton qorshaýǵa, keıin jerge qulap túsken.

Oqıǵanyń vıdeosy áleýmettik jelide tarady. Kadrlardan qurylǵy kóterilip kele jatyp, bir jaǵy aýdarylyp ketken sát anyq kórinedi.

«Nelikten tros úzildi? Men sizderge zańdylyq pen ádildik izdep keldim, al sizder ne istep otyrsyzdar?» – dep kóz jasyn tyıa almaı aıtqan áıeldiń sózderi vıdeoda estiledi.

Sottyń baspasóz qyzmeti tótenshe jaǵdaı trostyń úzilýinen bolǵanyn rastady. Aldyn ala sebepti «Kapıtal Lıft» JShS qyzmet kórsetýshi kompanııasynyń ókilderi anyqtaǵan.

Sot otyrysyna kelgen áıelge alǵashqy medıtsınalyq kómek kórsetilip, jedel járdem shaqyrylǵan. Qazirgi ýaqytta ol aýrýhanada, esin biledi.

Oqıǵa týraly polıtsııaǵa da habarlanǵan. Barlyq mán-jaıdy anyqtaý maqsatynda Astananyń Esil aýdany boıynsha tergeýshiniń qatysýymen tekseris júrgizilip jatyr.

Aıta keteıik, buǵan deıin múgedektigi bar adamdarǵa áýe bıletterine jeńildik jasaý týraly zań qaıta qaralatyny habarlandy.

Búginde Qazaqstanda 743 myńǵa jýyq múmkindigi shekteýli adam turady.