Astanada «Sot bıligi jáne BAQ» turaqty forýmy ótip jatyr

dep habarlaıdy QazAqparat.

 Atalmysh sharaǵa Joǵarǵy sot tóraǵasy Musabek Álimbekov pen Qazaqstan Jýrnalıster odaǵynyń tóraǵasy Seıitqazy Mataev, sondaı-aq Joǵarǵy sottyń sýdıalary men zańger mamandar,aqparat quraldarynyń basshylary men tilshiler qatysýda. 

 Otyrys barysynda elimizdiń aqparat keńistigindegi máseleler jóninde áńgime qozǵaǵan Seıitqazy Mataev qazirgi qoǵamda sot sheshimderiniń ádil, al aqparat quraldary taratatyn málimetterdiń shynaıy bolǵany jón ekendigin atap ótti. «Bul baǵytta sot organdary qyzmetiniń atqaratyn mańyzy zor. Óıtkeni elimizdiń kez kelgen aımaǵyndaǵy oryn alǵan máselelerge sońǵy sheshim shyǵaratyn organ - sot. Al olar aqparat quraldarynyń ókilderine meılinshe qoldaý kórsetip, demep otyrsa, nur ústine nur bolmaq», dedi tóraǵa.

 Osyǵan baılanysty ol jıyn barysynda búginde óziniń sot salasyndaǵy biliktiligimen jáne mol tájirıbesimen tanylyp, sol tájirıbesin jýrnalıster qaýymymen de bólisip júrgen Joǵarǵy sottyń sýdıasy Márzııa Baltabaıǵa arnaıy dıplom tabys etti.

 Búgin kúni boıy ótetin forým barysynda zańgerler men tilshiler elimizdiń aqparat keńistiginde oryn alyp otyrǵan jáne tilshiler qyzmetiniń sot organdarymen jumysy barysynda jıi kezdesetin kóptegen máseleler jóninde suraq- jaýap almasatyn bolady. 

 Esterińizge sala keteıik, «Sot bıligi jáne BAQ» forýmy turaqty túrde Astana jáne Almaty qalalarynda uıymdastyrylyp turady jáne oǵan negizinen tilshiler men zań qyzmetkerleri qatysady. Jıynnyń uıymdastyrýshysy QR Sýdıalar odaǵy men «Ádil sóz» halyqaralyq sóz bostandyǵyn qorǵaý qory. Atalmysh jobany AQSh-tyń Demokratııalyq agenttigi qoldap otyr. Joba 2,5 jylǵa eseptelgen. Kelesi jyly osy forým aıasynda jýrnalısterge arnalǵan «Sot qyzmeti jóninde jazatyn tilshige neni bilý kerek?», degen ádistemelik qural daıyndalmaq.