Astanada «Sońǵy qońyraý» atap ótilýde
ASTANA. 25 mamyr. QazAqparat - Búgin Astana mektepterinde kezekti oqý jylynyń aıaqtalǵanyn bildiretin sońǵy qońyraý oınaǵannan keıin,
elordalyq túlekterge arnalǵan dástúrli mereke saǵat 14.00-de qalanyń úsh jerinde: «Stýdenttik» saıabaqta, «Ǵashyqtar» saıabaǵynda jáne Qarjy mınıstrligi aldyndaǵy alańda jalǵasady. Bul týraly Astana ákimdiginiń baspasóz qyzmetinen málim etti.
«Árbir túlek osy sharalarda qurbylarymen tildesedi, bir-birine izgi tilekter bildirip, demalyp, mektep oqýshylary daıyndaǵan kontserttik baǵdarlamalardy tamashalaı alady», - deıdi Astana qalasy Bilim basqarmasynyń bastyǵy Ásıma Bımendına.
Á.Bımendınanyń aıtýynsha, bıylǵy jyly Astanada mektep bitirýshi 3988 túlektiń 3652-si UBT tapsyrýǵa daıyn. Qalǵandary halyqaralyq olımpıadalarǵa qatysyp, oqý granttaryna ıe bolǵan nemese sheteldik joǵary oqý oryndaryna túsý úshin dástúrli emtıhan tapsyrady.
Á.Bımendınanyń aıtýynsha, 2012 jyldyń basty jańalyǵy - kolledj túlekteri úshin testileýdiń engizilýi bolyp tabylady.
«Joǵary oqý oryndaryna túsý úshin olar ózderi ótken baǵdarlama boıynsha UBT-daǵy pánderdeı keshendi testileýden ótedi. 9 shildege deıin joǵary oqý oryndaryna túsýdi qalaǵan kolledj túlekterinen ótinishter qabyldanady. Qazir test tapsyrmalary ázirlenip jatyr, tekserý synaqtary júrgizilýde», - dedi ol.
Elordanyń bas muǵalimi támamdalǵan oqý jylyn tabysty ekendigin de erekshe nazarǵa aldy. Buǵan aldyn-ala berilgen qaladaǵy ortasha statıstıkalyq málimetter ǵana emes, oqýda úzdik nátıjelerge qol jetkizgen daryndy balalardyń jetistikteri de dálel bola alady.
Astanada «Altyn belgige» 178 oqýshy úmitker atanyp otyr. Respýblıkalyq olımpıadalar men ǵylymı saıystar qorytyndysy boıynsha elordalyq komanda 95 júldege ıe bolyp, kezekti ret jalpykomandalyq esepte birinshi oryn aldy. Astanalyq mektep oqýshylarynyń qorjynynda olımpıadalardan 7 altyn men respýblıkalyq ǵylymı saıystardan bir altyn bar.
Jergilikti oqýshylar halyqaralyq deńgeıde de sátti óner kórsetti. Búgingi ýaqytqa deıin olar Brazılııa, Koreıa, Qytaı, Reseı, Túrkııa, Rýmynııa, Úndistan, Grýzııa, Kıpr jáne basqa da elderden 92 júldeli oryn aldy.
Qazaqstan olımpıadalyq quramasyna Astanadan 3 oqýshy kiredi. Bul QTL shákirtteri Ázim Amanjolov pen Aıdar Jetesov, sondaı-aq «Zerde» daryndy balalarǵa arnalǵan mektebiniń oqýshysy Ákejan Amangeldın.
«Bıyl Astananyń úzdik túlekteri men olardyń ustazdary Oqýshylar saraıynda «Trıýmf» balynda marapattalady», - dep habarlady Á.Bımendına.
«Jyl saıyn Astanadaǵy olımpıadalar men ǵylymı saıystar jeńimpazdarynyń sany ulǵaıyp keledi. Sondyqtan biz olardyń barlyǵyn balǵa shaqyrdyq. Onda tek qana mektep bitirýshi túlekter emes, 10 synyp oqýshylary, 9 synypta oqıtyn birneshe adam bar», - dedi Á.Bımendına.
«Baldyń jańa Oqýshylar saraıynda ótýi mańyzdy. Munda ǵylymı úıirmeler óte kóp», - dep jalǵastyrdy ol.
Á.Bımendınanyń aıtýynsha, baldyń ataýy da erekshe mánge ıe.
«Prezıdent búgingi tańda jastar úshin jasalyp jatqan ıgilikter erteń elimiz úshin eki ese bolyp qaıtady degen senimde. Bizdiń balaqaılar muny mektep qabyrǵasynan bastap dáleldeýde, halyqaralyq olımpıadalardaǵy jeńister bul úlken trıýmf!», - dep atap ketti ol.
Onyń aıtýynsha, segiz altyn júldegerge qala ákimi atynan syılyqtar tabys etiledi, olarǵa tálim-tárbıe bergen ustazdar bilim mınıstrliginen nagradalarǵa ıe bolady.
Balǵa qatysýshylarǵa arnalǵan kontserttik baǵdarlamada qala mektepteriniń ujymdary, sondaı-aq QR eńbek sińirgen ártisi Baqyt Shadaeva men «Aınalaıyn» bı toby, respýblıka boıynsha úzdikter qataryna kiretin Astana qalasyndaǵy balalar úıiniń úrmeli orkestri óner kórsetedi.
