Astanada sóndirilmegen sirińke kólik órtine sebep boldy
ASTANA. KAZINFORM – Astanada avtoturaqta bolǵan kólik órtine baılanysty sot eki kólik ıesin de bolǵan oqıǵaǵa kináli dep tanydy.
Іs materıaldaryna sáıkes, oqıǵa 2025 jyldyń mamyr aıynda elordadaǵy avtoturaqtardyń birinde bolǵan. Jaýapker kóliginde temeki shegip otyryp, ashyq terezeden sóndirilmegen sirińkeni syrtqa laqtyrǵan. Sol sátte gaz ballon júıesimen jabdyqtalǵan jaqyn mańdaǵy Audi A6 kóligi órtenip ketken.
Talap qoıý kólik ıesiniń turǵylyqty jeri boıynsha berilgendikten, isti Taraz qalalyq soty qaraǵan.
Táýelsiz baǵalaý qorytyndysyna sáıkes, keltirilgen materıaldyq zalal 2,9 mln teńgeden asqan. Órttiń bastalý sáti beınebaqylaý kamerasyna túsip qalǵan.
«Saraptama órttiń talap qoıýshynyń kóliginen gaz býlarynyń shyǵýy nátıjesinde paıda bolǵan gaz-aýa qospasynyń tutanýynan bolǵanyn anyqtady. Al tutaný kózi jaýapker laqtyrǵan sóndirilmegen sirińke bolǵan», – dep málimdedi sot.
Jaýapkerge qatysty qylmystyq is qasaqanalyqtyń bolmaýyna baılanysty, al ákimshilik is júrgizý eskirý merziminiń ótýine baılanysty toqtatylǵan. Alaıda bul ony azamattyq-quqyqtyq jaýapkershilikten bosatpaǵan.
Sot órtengen kóliktiń ıesi de óreskel abaısyzdyqqa jol bergenin atap ótti. Atap aıtqanda, gaz ballon júıesimen jabdyqtalǵan avtokólik uzaq ýaqytqa turaqqa qoıylar aldynda órt qaýipsizdigi talaptaryna sáıkes tekserilmegen, sonyń saldarynan gazdyń shyǵýyna jol berilgen.
Sot eki taraptyń da kiná dárejesin eskere otyryp, talap qoıýdy ishinara qanaǵattandyrdy. Nátıjesinde jaýapkerden talap qoıýshynyń paıdasyna 1,6 mln teńgeden astam materıaldyq zalal men sot shyǵyndary óndirildi.
Aıta keteıik, Qyzylordada órt qaýipsizdigin saqtamaǵandarǵa 11,4 mln teńgeden astam aıyppul salyndy.
