Astanada Soltústik Qazaqstan jáne Aqtóbe oblystarynyń jármeńkesi ótedi
ASTANA. QazAqparat - 8 jáne 9 qazanda elordadaǵy aýylsharýashylyq jármeńkesinde óz ónimderin Soltústik Qazaqstan jáne Aqtóbe oblystarynyń taýar óndirýshileri usynady, dep habarlaıdy QazAqparat.
Astana ákimdiginiń resmı saıtynda málim etilgendeı, jármeńkege 130-ǵa jýyq kásiporyn qatysady. Assortıment 1200 tonnadan astam ónimdi quraıdy. Olardyń ishinde kartop pen kókónister – 741 tonna, ettiń barlyq túri jáne shujyq ónimderi – 208 tonna, sút ónimderi – 45 tonna, balyq – 20 tonna, bal – 26 tonna, un men makaron ónimderi – 148 tonna, jumyrtqa – 125 myń dana, sondaı-aq osy óńirlerde óndiriletin ózge ónimder bar.
«Barlyq ónimder sanıtarlyq-epıdemıologııalyq talaptarǵa saı, satýshylarda ónimderdiń shyǵý tegin, sapasy men qaýipsizdigin rastaıtyn qujattar bolady.
Sondaı-aq elorda turǵyndary men qonaqtary úshin kontserttik baǵdarlama daıyndaldy», - delingen habarlamada.
Ónimder deldalsyz usynylatyndyqtan, olardyń baǵasy 10-20% tómen bolady.
Eske salaıyq, jármeńkeler ár senbi jáne jeksenbi kúnderi 30 qazanǵa deıin ótedi. Ótetin orny: «Astana-Arena» stadıonynyń janyndaǵy alań.
15-16 qazanda óz ónimderin Pavlodar oblysynyń kásipkerleri usynady.
Foto: gov.kz
