Astanada Soltústik Qazaqstan oblysynyń kúnderi ótedi
ASTANA. QazAqparat - 22 jáne 23 qazanda «Han Shatyr» SOSO mańyndaǵy aýmaqta Soltústik Qazaqstan oblysynyń «Óńir berekesi» aýyl sharýashylyq ónimderiniń jármeńkesi ótedi. Bul týraly Astana ákimdiginen habarlady.
Elorda turǵyndary men qonaqtaryna óńirdiń jáne oblys ortalyǵynyń 100-den astam aýyl sharýashylyǵy qurylymdary men qaıta óńdeý kásiporyndarynyń ónimderi qoıylady. Astanada 741 tonna aýyl sharýashylyǵy ónimin satý josparlanǵan, sonyń ishinde: et jáne sút ónimderi, balyq, jemis jáne kókónister, shujyq ónimderi, bal jáne t.b. bar. Jármeńkege 100-den asa ónim túrleri usynylady.
Jármeńke aıasynda Soltústik Qazaqstan oblysy shyǵarmashylyq ujymdarynyń uıymdastyrýymen kontserttik baǵdarlama uıymdastyrylady.
Budan bólek, elorda turǵyndary men qonaqtaryna mazmundy mádenı baǵdarlama daıyndalǵan. 18 qazanda saǵat 18:30-da M. Gorkıı atyndaǵy memlekettik akademııalyq orys drama teatrynda kórermender nazaryna N. Pogodın atyndaǵy oblystyq orys drama teatrynyń «Maǵjannyń soty» qoıylymy usynylady.
21 qazan kúni saǵat 18:30-da Q. Qýanyshbaev atyndaǵy Memlekettik akademııalyq qazaq mýzykalyq drama teatrynda S. Muqanov atyndaǵy qazaq mýzykalyq-drama teatrynyń ártisteri «Elim-aı» tarıhı dastanynyń jelisinde «Daýylpaz baba - Qojabergen» spektaklin sahnalaıdy.
Kishkentaı kórermender úshin «Jastar» saraıynda 19, 20, 21 qazan kúnderi saǵat 10:00, 12:00, 14:00-de oblystyq qýyrshaq teatry «Áýele, dombyra!» spektaklin qoıady.
Balalar úıiniń tárbıelenýshileri úshin 21 qazan saǵat 10:00-de «Meniń dosym - baǵdarsham» atty qaıyrymdylyq qoıylymy kórsetiledi.
20 qazan saǵat 11:00-de Astana qalasynyń memlekettik muraǵatynda Soltústik Qazaqstan oblystyq muraǵatynyń uıymdastyrýymen «Soltústiktiń baılyǵy: biregeı muraǵat qujattaryndaǵy tarıh» kórmesi uıymdastyrylady. Іs-shara aıasynda qala tarıhy, oblys ortylyǵynyń ataqty tulǵalary týraly «Petropavl qalasy» atty derekti fılm kórsetiledi.
22 qazan saǵat 11:00-den bastap Beıbitshilik jáne kelisim saraıynda SQO-nyń murajaılyq birlestiginiń uıymdastyrýymen «Týǵan jerdiń tartylysy» kórmesi, sondaı-aq jergilikti sýretshilerdiń «Óńir marjany» kórme ekspozıtsııasy uıymdastyrylady. Osy jerde aǵashty oıýlaý, qaıyń qabyǵynan jáne kıizden túrli buıymdar jasaý sııaqty qoldanbaly óner túrlerinen sheberlik dáristeri ótedi.
22 qazan saǵat 11:00-de Ulttyq kitaphananyń kórme zalynda S. Muqanov atyndaǵy oblystyq kitaphananyń «Soltústik Esil óńiri - órisi bıik ólke» bezendirilgen kitaptar kórmesi ótedi.
22 qazan saǵat 17:00-de Beıbitshilik jáne kelisim saraıynda Soltústik Qazaqstan oblysynyń úzdik shyǵarmashylyq ujymdarynyń «Maǵjan elinen-Elorda tórine» atty gala-kontserti ótedi.
