Astanada soqqyǵa jyǵylǵan bes jasar qyz anasyna qaıtarylýy múmkin
ASTANA. QazAqparat - Bala quqyqtary boıynsha sarapshylar Astanada soqqyǵa jyǵylǵan bes jasar qyz balanyń bolashaq taǵdyry jaıly bir sheshimge kelýdi oılastyrýda, dep habarlaıdy «QazAqparat» HAA tilshisi.
«Bala árdaıym óziniń jaqyn týystarynyń janynda ózin jaqsy sezinedi. Mundaı jaǵdaıda eń jaqsy orta - otbasy. Biraq, qyz balanyń ákesi joq, al anasy aýyr bap boıynsha 6 jylǵa sottalyp ketken. Ol (anasy) jazasyn óteý merzimin uzartý týraly appelıatsııaǵa berdi, al men bolsam ol hatty jaýapty memlekettik organdarǵa joldadym. Ózim de sot organdaryna hat jazaıyn dep otyrmyn», - dedi Bala quqyqtary jóninde ýákil Zaǵıpa Balıeva «QazAqparat» HAA tilshisine.
Sonymen qatar, Zaǵıpa Balıeva iske aralasýǵa quqyǵy joq bolǵanymen, jazasyn óteý merzimin uzartýdy suraı alatynyn jetkizdi.
«QR Qylmystyq kodeksine sáıkes, jazasyn óteýshiniń 14 jasqa deıingi balasy bolsa, ol jazasyn óteýdi 5 jylǵa deıin uzartýǵa ótinish bere alady. Eger uzartý merzimi týraly sheshim qabyldansa, qyz bala anasyna qaıtarylady. Eger sot qylmysty aýyr dep tanyp, jazasyn óteý merzimin uzartýdan bas tartsa, balany qaıda jiberýdi sheshemiz. Mundaı jaǵdaıda Almatyda onyń ápkesi bar. Qazir ol qajetti qujattardy jınap, balany qamqorlyǵyna alǵysy kelip otyr», - dedi Zaǵıpa Balıeva.
Onyń aıtýynsha, mundaı nusqaǵa qamqorlyqqa alý týraly organdardyń tekserisi kedergi keltirýi múmkin.
«Qazirgi ýaqytta jaýapty organdar asyrap alǵysy kelgen adamnyń turǵan jerin, jaǵdaıy men basqa da jaılardy tekserýi kerek. Bul tekseris qyz balaǵa shynynda da barlyq jaǵdaı jasala ma, joq pa - sony bilý úshin júrgiziledi. Qazir qyz bala emdeý kýrsynan ótip jatyr. Onymen psıholotar jumys júrgizýde», - dedi ol.
Zaǵıpa Balıevanyń aıtýynsha, joǵaryda atalǵan eki nusqa da iske asyrylmasa qyz balany balalar úıine tapsyrýdan basqa amal qalmaıdy. Dese de, onyń aıtýynsha, balany ápkesine berý nusqasy oryndalýy múmkin.
Eske sala ketsek, 3 naýryz kúni Qýat Ahmetjanov Qazaqstandaǵy Bala quqyqtary jóninde ýákildiń Feısbýktegi paraqshasynda WhattsApp messendjerinen kelgen kishkentaı qyz týraly habarlama men onyń fotosýretin jarııalaǵan bolatyn. Ol denedegi soqqy izderimen qalalyq №2 balalar aýrýhanasyna túsken.
Jelidegi jazbanyń avtory áıel bolǵan. «Men ózim qyzymmen №2 aýrýhanada jatyrmyn. Aldyńǵy kúni bizdiń bólimshege kóptegen jaraqatpen 5 jasar qyz kelip tústi. Kelesi kúni onyń basyna birden ota jasaldy. Bir sózben aıtqanda, dárigerler onyń janyn aman alyp qaldy. Qyz balaǵa kómektesý týraly jazbamdy jarııalaýdy suraımyn», - dep jazǵan ol.
