Astanada soǵym jármeńkesin sol jaǵalaýda ótkizý josparlanyp otyr

ASTANA. KAZINFORM – Elordada «Soǵym Fest» et jármeńkesin sol jaǵalaýda da ótkizý kózdelip otyr. Bul týraly Astana qalasynyń Investıtsııalar jáne kásipkerlikti damytý basqarmasy basshysynyń orynbasary Maqsat Jańabaev málimdedi.

Astanada «Soǵym-FEST» bastaldy: etti deldalsyz satyp alýǵa bolady
Foto: Saýda mınıstrligi

Onyń aıtýynsha, qazir jármeńke elordanyń úsh saýda alańynda ótip jatyr.

– Jármeńkeni sol jaǵalaýda da ótkizýdi josparlap otyrmyz. Qazir ony qaı jerde uıymdastyrýǵa bolatynyn talqylap jatyrmyz, – dedi Maqsat Jańabaev Astana qalasynyń Kommýnıkatsııalar qyzmetinde ótken baspasóz konferentsııasynda.

Qarashada bastalǵan jármeńke jeltoqsannyń sońyna deıin ár senbi men jeksenbide myna mekenjaılarda ótedi:

· Keruen Joly saýda ortalyǵy – Alash tasjoly, 35B;
· «Et Álemi» saýda ortalyǵy – Alash tasjoly, 31/1;
· Jurt saýda ortalyǵy – Beıbarys Sultan kóshesi, 3.

Jármeńkede sıyr etiniń kelisi 3 300 teńgeden, jylqy eti 3 500 teńgeden, qoı eti 3 700 teńgeden bastalady.

Basqarma ókiliniń aıtýynsha, jármeńkedegi bastapqy baǵalar respýblıkalyq ortasha baǵadan tómen. Atap aıtqanda, jylqy eti 19 paıyzǵa, qoı eti 17 paıyzǵa, sıyr eti 13 paıyzǵa arzan.

Máselen, 50 keli jylqy etin jármeńkedegi bastapqy baǵamen satyp alǵan turǵyn respýblıkalyq ortasha baǵamen salystyrǵanda 42 myń teńgege jýyq qarajat únemdeı alady.

Astanada «Soǵym Fest» jármeńkesi úshinshi jyl qatarynan ótkizilip keledi. Munda turǵyndar etti óndirýshilerdiń ózinen deldalsyz satyp ala alady.

Eske salaıyq, bıyl Astanada «Soǵym-FEST» jármeńkesi aıasynda 1 myń tonnadan astam et satý josparlanǵan edi.