Astanada SOBR qyzmetkerlerin urǵandar 3 jylǵa sottaldy
ASTANA. KAZINFORM – Elordada jedel áreket etý arnaıy jasaǵynyń (SOBR) qyzmetkerlerine shabýyldaǵandarǵa sot úkimi shyqty. Bul týraly qalalyq sot habarlaıdy.
2025 jylǵy 21 qańtarda saǵat 14.00 shamasynda sottalýshylar T.A., J.T., H.S. jedel ýákil S.M.-men birge jedel ýákildiń jeke zattaryn tasymaldaýǵa kómektesý úshin Astana qalasy Esil aýdanynyń polıtsııa basqarmasynyń ǵımaratyna kelgen.
Alaıda, polıtsııa ǵımaratyna kire beriste janjal týyndaǵan, sottalýshylar aldyn ala sóz baılasý arqyly qyzmettik mindetin atqarý kezinde bılik qyzmetkerlerine kúsh kórsetken. Nátıjesinde jábirlenýshi E.D.-ge ortasha dárejedegi, jábirlenýshi S.N.-ge jeńil dárejedegi dene jaraqaty keltirildi.
Sottalýshylardyń kinási jábirlenýshilerdiń, kýágerlerdiń aıǵaǵymen, sondaı-aq saraptamanyń qorytyndysymen rastaldy.
Prokýror sottalýshylardyń árqaısysyna 3 jyl merzimge bas bostandyǵynan aıyrý jazasyn taǵaıyndaýdy surady. Jábirlenýshilerdiń sottalýshylarǵa shaǵymy joq. Sottalýshylar kináni ishinara moıyndady jáne jábirlenýshilermen tatýlasýǵa baılanysty bas bostandyǵynan aıyrýǵa jatpaıtyn jaza taǵaıyndaýdy surady. Sondaı-aq, qorǵaýshy tarap ta bas bostandyǵynan aıyrmaıtyn jaza taǵaıyndaýdy surady.
- Aýyrlatatyn mán-jaı joq. Sot úkimimen T.A., H.S. jáne T.J. Qylmystyq kodekstiń 380-baby 4-bóliginiń 1,3) tarmaǵy boıynsha kináli dep tanylyp, 3 jylǵa bas bostandyǵynan aıyryldy, - delingen habarlamada.
Sot úkimi zańdy kúshine engen joq.
Eske salaıyq, jyl basynda Astanada jedel áreket etý arnaıy jasaǵy (SOBR) qyzmetkerlerine shabýyl jasaldy. Keıin polıtsııa is qozǵady.