Astanada SMS qulaqtandyrý arqyly aıyppul óndirý tıimdi bolyp shyqty

ASTANA. QazAqparat - Astana qalasynyń prokýratýrasy ishki ister organdary salǵan ákimshilik aıyppuldardyń tólenýine qatysty máselelerdi taldap shyqty. Sońǵy 5 jylda bul kórsetkishtiń 50 paıyzdan aspaǵany anyqtalǵan, dep habarlaıdy QazAqparat qalalyq prokýratýraǵa siltememen.

Onyń negizgi sebebi qarapaıym bolyp shyqty - quqyq buzýshylar boryshy bar ekenin bilmegen. Poshta arqyly jiberilgen tıisti uıǵarymdar aıyppul tóleýshiniń ózine jetpeıdi.

Elordalyq polıtsııa departamenti bul problemany sheshý úshin 2017 jyldyń qyrkúıeginde quqyq buzýshylardyń telefon nómirlerine testileý rejiminde SMS-habarlamalar jibergen. Alaıda bul shara birden elene qoıǵan joq, óıtkeni kóptegen turǵyndar ózderine kelip jetken habarlamanyń shynaıylyǵyna kúmándanǵan.

Osyndaı reaktsııany boldyrmaý úshin, qalalyq prokýratýra polıtsııa departamentimen birlesip, barlyq múddeli memorgandardyń pikiri esepke alynǵan algorıtmdi jasap shyqty.

Endi jol júrý erejeleri buzylǵan kezde, aıyppul týraly málimetter Ákimshilik quqyq buzýshylyqtardyń biryńǵaı tizilimine engizilip, odan keıin elektrondy úkimet portalynyń biryńǵaı baılanys ortalyǵy arqyly telefon nómiri tekserilip, oǵan tólenbegen aıyppul týraly SMS-habarlama jiberiledi.

2018 jyldyń sáýir aıynan bastap bul ádis onlaın rejimde jumys istep tur.

Osy ýaqytta quqyq buzýshylarǵa 140 myńnan astam habarlama jiberilgen. Atalǵan qyzmettiń bıýdjetten shyǵyn qajet etpeıtinin atap ótý kerek.

Jańa ádistiń arqasynda elordada aıyppuldardy tóleý deńgeıi 73 paıyzǵa ósken.

Quqyq qorǵaýshylardyń aqparattandyrý sapasyn arttyrý maqsatynda prokýratýra organdary Qamqor.gov.kz saıtynda «Aıyppuldaryńdy tekser» atty bólim ashty. Munda azamattar ózderinde bar aıyppuldar týraly aqparatty habarlandyrýsyz teksere alady.