Astanada Smart City platformasy tolyq rejımde jumys isteı bastady
ASTANA. KAZINFORM – Astanada qala úderisterin basqarý tıimdiligin arttyrýǵa baǵyttalǵan Astana Smart City jasandy ıntellekt platformasy iske qosyldy. Joba Memleket basshysynyń tapsyrmasy boıynsha júzege asyrylyp, tolyqqandy rejımde paıdalanýǵa berildi. Bul týraly Astana ákimi Jeńis Qasymbek Jibek Joly arnasynda aıtty.
Ákimniń aıtýynsha, júıe eki jarym aı boıy synaqtan ótkizilip, keıin tolyq jumys rejımine kóshirilgen. Joba aıasynda qaladaǵy beınekameralar sany eki esege arttyrylyp, olar vıdeoanalıtıka fýnktsııalarymen jabdyqtalǵan.
– Júıe qalada bolyp jatqan oqıǵalardy naqty ýaqyt rejıminde baqylap, sý, jylý, gaz jáne elektr jelilerine qatysty apattyq jaǵdaılarǵa jedel áreket etýge múmkindik beredi, – dedi ol.
Platforma baqylaý kameralarynan, datchıkterden jáne kommýnaldyq ári jedel qyzmetterdiń aqparattyq júıelerinen kelip túsetin derekterdi biriktiredi. Barlyq sıgnaldar sıtýatsııalyq ortalyqqa túsip, jaýapty qyzmetterge baǵyttalady. Sonymen qatar júıe kommýnaldyq qyzmetterdiń, sonyń ishinde qar tazalaý men qoqys shyǵarý jumystarynyń sapasy men jyldamdyǵyn baqylaýǵa múmkindik beredi.
Jol qaýipsizdigi salasynda Astana Smart City júıesi 15 túrge deıingi quqyqbuzýshylyqty anyqtaı alady. Jobada 60 myńnan astam beınebaqylaý kamerasy qoldanylady.
Jobany ázirlegen Presight kompanııasynyń bas dırektory Tomas Pramotedhamnyń aıtýynsha, platformany jasaýǵa shamamen 60 qazaqstandyq ınjener halyqaralyq mamandarmen birge bir jarym jyl boıy jumys istegen.
– Astana – Ortalyq Azııada jobanyń múmkindikterin kórsetýge arnalǵan negizgi alań. Aldaǵy ýaqytta bul sheshimdi eldiń basqa óńirlerine de keńeıtý josparlanyp otyr, – dedi ol.
Joba aıasynda derekter ortalyǵy qurylyp, ol elordanyń qazirgi jáne bolashaqtaǵy qajettilikterin qamtamasyz etedi. Onyń bazasynda jasandy ıntellekt servısteri jumys istep, júıeniń damýyna yqpal etip jatyr.
Sonymen qatar platforma kólik qozǵalysyn josparlaý salasynda da qoldanylady. Júıe kólik aǵyndary men kóshelerdiń júktemesin taldap, jol qozǵalysy syzbalaryn ózgertý jáne ınfraqurylymdy damytý boıynsha sheshim qabyldaýǵa múmkindik beredi.
Astana qalasy tsıfrlandyrý jáne memlekettik qyzmetter basqarmasynyń basshysy Berik Ahmetovtiń aıtýynsha, boljamdy analıtıkany paıdalaný azamattardyń memlekettik organdarǵa júginbesten sheshim qabyldaýǵa jol ashady.
Joba jeke ınvestıtsııalar esebinen júzege asyrylǵan. Aldaǵy ýaqytta osyndaı sheshimderdi Qazaqstannyń ózge óńirlerinde de engizý josparlanyp otyr.
Sondaı-aq Qazaqstan men Koreıa Alatau Smart City jobasyn birlese damytýǵa kelisken edi.