Astanada skeıtpark ashyldy
ASTANA. QazAqparat - Elordadaǵy «Saryarqa» respýblıkalyq velotregi aýmaǵynda kóshe sportyna arnalǵan jańa alań ashyldy. Qazaqstan jastarynyń arasynda keń taralǵan zamanaýı sport túri - skeıt parkiniń ashylýyna QR mádenıet jáne sport mınıstrliginiń jaýapty hatshysy Qýatjan Ýálıev qatysty.
Qýatjan Ýálıev pen respýblıkalyq velotrektiń dırektory Baýyrjan Muqashev jańa alańnyń dástúrli qyzyl lentasyn kesti. «Jańa sport nysanynyń ashylýymen quttyqtaımyn! Búgingi jastar baqytty, óıtkeni olardyń súıikti isterimen aınalysýlaryna barlyq jaǵdaı jasalǵan keremet ýaqytta ómir súrip jatyr. Bul skeıtpark sizderge paıdaly bolady dep úmittenemin», - dedi Q.Ýálıev saltanatqa qatysýshylarǵa arnaǵan quttyqtaý sózinde. Shara aıasynda astanalyq velosıped motokrossy, skeıt, rollerler, strıt vorkaýt pen parkýr sportshylary óner kórsetip, jınalǵan qaýymdy kóshe sportynyń keremetterimen tamsandyrdy. Al kórermender arasynda arnaıy baıqaýlar uıymdastyrylyp, lotereıalar oınatyldy. Jeńimpazdarǵa estelik syılyqtar tapsyryldy, dep habarlaıdy QR Mádenıet jáne sport mınıstrliginen.
