Astanada «Sizdiń jolaýshyńyz - bala!» aldyn alý is-sharasy bastaldy
ASTANA. 23 tamyz. QazAqparat - Búgin Astanada balalar arasyndaǵy jol-kólik jaraqattarynyń aldyn alý jónindegi is-shara sheńberinde qalalyq ákimdik janyndaǵy qýyrshaq teatrymen birge qaýipsizdik belbeýlerin jáne kóliktegi balalarǵa arnalǵan arnaıy oryndyqtardy qoldaný kerektigin elemeıtin júrgizýshilerdi anyqtaýǵa baǵyttalǵan «Sizdiń jolaýshyńyz - bala!» úgitteý is-sharasy bastaldy. Bul týraly Astana qalasy ІІD jol polıtsııasynyń baspasóz qyzmetinen habarlady.
«Tańerteńgi ýaqytta jol polıtsııasy «kishkentaı jolaýshylardy» ustap otyratyn arnaıy qurylǵylarsyz tasymaldaǵan júrgizýshi-ata-analardy anyqtaý maqsatynda qalalyq mektepke deıingi bilim berý mekemeleriniń mańynda kezekshilik júrgizdi. Іs-shara kezinde ınspektorlar júrgizýshilermen aldyn alý maqsatyndaǵy taqyryptyq eskertpeler men únparaqtardy taratyp, áńgime júrgizdi. Al búldirshinderge ashyq tústi kıim kıgizilgen boıly qýyrshaqtar, tátti syılyqtar taratty», - delingen habarlamada.
Eske sala keteıik, aǵymdaǵy jyldyń 7 aıynda astana joldarynda balalardyń qatysýymen 80 jol-kólik oqıǵasy tirkelgen. Onyń ishinde 2 bala qaza tapty, 80-i ártúrli jaraqat aldy.
Astana qalasy jol polıtsııasy basqarmasy joldardaǵy qaýipsizdik sharalaryn este ustaýǵa shaqyrady: balalardy óz tizelerińizge otyrǵyzyp tasymaldamańyzdar - apat bolsa, siz ony ustap qala alamısyz, qaıta qysyp tastaısyz; balany ustap turatyn arnaıy qurylǵysyz shtattyq qaýipsizdik belbeýimen bekitpeńizder - belbeý eresek adamǵa arnalǵan, sondyqtan ol balany qorǵap qalmaıdy; eresek adam men balany bir belbeýmen bekitpeńizder; balaǵa júrgizýshiniń art jaǵynda, aldyńǵy oryndyqtardyń arqalyqtarynyń aralyǵynda turýǵa ruqsat etpeńizder; balaǵa qozǵalysqa qarsy otyrýǵa ruqsat etpeńizder - qaqtyǵysqan jaǵdaıda bala shúıdesimen qulaıdy.
