Astanada «Siz kimsiz, Ka myrza?» atty qazaqstandyq jańa fılmniń kórsetilimi boldy

dep habarlaıdy QazAqparat.

Sh.Aımanov atyndaǵy «Qazaqfılm» kınostýdııasy men reseılik «Izarýsfılm» kınokompanııasy túsirgen fılmniń basty rólderin - Keńes Odaǵy jáne Qazaqstannyń Halyq ártisi Asanáli Áshimov (Ka myrza) pen qazaqstandyq jas ártis Fılıpp Voloshın (Igorek) somdady. A.Áshimovtyń ıdeıasymen jaryqqa shyqqan lentanyń qoıýshy-rejısseri Hýat Ahmetov, prodıýserleri - Venera Nyǵmatýlına jáne Áljan Ibragımov.

Barys jylyndaǵy alǵashqy premerany tamashalaýǵa óner, mádenıet jáne qoǵam qaıratkerleri, birqatar memlekettik organdardyń laýazymdy tulǵalary men kınosúıer kópshilik qaýym jınaldy. Kartınany kórýge qyzyǵýshylyq tanytqandardyń sany kóp bolǵany sonsha, zalǵa syımaǵan halyq bir jarym saǵatqa jýyq ýaqytqa jalǵasqan kınony turyp tamashalaýdan taıynbady.

QR Mádenıet jáne aqparat mınıstri Muhtar Qul-Muhammedtiń atap kórsetýinshe, «Siz kimsiz, Ka myrza?» fılmi Sh.Aımanovtyń eń sońǵy týyndysy - «Atamannyń aqyry» men «Transsibir eskpresi» fılmderiniń zańdy jalǵasy ispetti. Sebebi, olar ártúrli rejısserlardyń qoldarynan shyqsa da, kartınalardaǵy otanǵa, elge qyzmet etý sııaqty uly sezimder men qasıetterdi jetkizý ıdeıalarynyń negizi bir.

Uzaq jyldardan keıin Bangkoktyń túrmesinen bosap shyqqan Ka myrza, Otanyna oralmaq bolyp mingen poıyzdyń kýpesinde Igorek esimdi jolserigimen tanysady. Al esirtki tasymalymen aınalysatyn jas jigit, «taýardy» dittegen jerine Ka myrzanyń arqasynda oǵan bildirtpeı jetkizip alýdy kózdep, esirtki jasyrylǵan ydysty qartqa syıǵa tartqan bolady. Biraq ótken ómirinde mol «tájirıbesi» bar qart, onyń pıǵylyn birden túsinip, esirtkiniń kózin joıady. Budan keıin Ka myrza, Igorekty «tapsyrys berýshilerdiń» óliminen aman-alyp qalý úshin eriksiz qylmystyq toptyń ortasyna túsedi. Jas balany ólim aýzynan arashalap qalý úshin óziniń burynǵy «baılanystarymen» qylmyskerlerge esirtkiniń iri kólemin jetkizip berýge de kelisedi.

Fılmniń sońynda uzaq ýaqyt polıtsııanyń baqylaýynda bolǵan qylmystyq top quryqtalady. Al olardy qolǵa túsirý - qazaqstandyq agent - Ka myrzanyń otandyq quqyq qorǵaý organdarymen áý bastan kelisken naqty syzba-josparlardyń arqasynda júzege asyrylǵandyǵy anyqtalady.

Kórsetilimniń sońynda suhbat bergen A.Áshimov: «Fılmge qoldaý bildirýshiler óte kóp bolǵandyqtan, ony nashar shyǵarýǵa quqyǵymyz bolǵan joq. Barlyq trıýktardy da ózim jasadym», - dep atap ótti.

Al H.Ahmetovtyń atap kórsetkenindeı, fılm Qazaqstan, Taıland jáne Reseı aýmaqtarynda atalmysh elderdiń tanymal ártisteriniń qatysýymen túsirilgen. Kartınanyń prodıýseri V.Nyǵmatýlınanyń aıtýynsha, úsh eldiń 80-nen astam nysanynda jasalǵan túsirilimder óte qymbatqa túsken. «Biz ózin aqtap shyǵatyn kommertsııalyq maqsattaǵy kartınany túsirýge tyrystyq jáne ol qolymyzdan keldi dep oılaımyn», - deıdi ol.

V.Nyǵmatýlına memlekettiń tapsyrysymen túsirilgen fılmniń jalpy bıýdjetin qupııada saqtaǵanymen, reseılik kınokompanııa ózderiniń yntalarymen oǵan 600 myń AQSh dollaryn quıǵandyǵyn jasyrmady.

Sondaı-aq ol jańa qazaqstandyq fılm aldaǵy ýaqytta Reseı jáne Taılandta kórsetiletinin, bul jóninde eki el kınokompanııalarymen kelissózder de bastalyp ketkendigin jetkizdi.

Esterińizge sala keteıik, almatylyq kınosúıer qaýym úshin «Siz kimsiz, Ka myrza?» fılminiń tusaýkeseri «Alataý» kınoteatrynda, qańtardyń 21-i kúni saǵat 18.00-de ótedi.