Astanada Sı Tszınpınniń qazaq tilindegi kitaby tanystyryldy
ASTANA. KAZINFORM — Astanadaǵy Nazarbaev Ýnıversıtetinde Qytaı Halyq Respýblıkasynyń Tóraǵasy Sı Tszınpınniń «El basqarý jóninde» atty tórt tomdyq kitabynyń tusaýkeseri ótti, dep habarlaıdy Mádenıet jáne aqparat mınıstrligi.
Іs-sharaǵa Qazaqstan Respýblıkasynyń Mádenıet jáne aqparat mınıstri Aıda Balaeva, Qytaı Kommýnıstik partııasy Ortalyq komıtetiniń úgit-nasıhat bólimi meńgerýshisiniń orynbasary Hý Hepın, QHR Ult isteri jónindegi komıtet tóraǵasynyń orynbasary Go Veıpın, QHR Shetel ádebıetin basyp shyǵarý jáne taratý jónindegi bas basqarmasynyń jetekshisi Dý Chjanıýan, sondaı-aq Qazaqstan Respýblıkasyndaǵy QHR-dyń Tótenshe jáne Ókiletti Elshisi Han Chýnlın qatysty.
Jıyn barysynda Aıda Balaeva eki el arasyndaǵy mádenı yntymaqtastyqtyń mańyzyn atap ótti.
— Qytaı — Qazaqstan úshin senimdi dos, odaqtas ári strategııalyq seriktes. Eki el arasyndaǵy ǵasyrlar boıǵy dostyq, ózara qurmet pen senimge negizdelgen yntymaqtastyq búginde barlyq baǵytta tabysty damyp keledi. Memleketterimizdiń basshylary arasyndaǵy ózara túsinistik pen joǵary deńgeıdegi senim — ekijaqty qarym-qatynastardyń nyǵaıýyna zor yqpal etýde. Bul kitap — Qytaı memleketiniń saıası baǵyt-baǵdaryn, ulttyq birlik pen turaqtylyqty qamtamasyz etýdegi ustanymdaryn, sondaı-aq uzaqmerzimdi strategııalyq maqsattaryn túsinýge umtylatyn qazaqstandyq oqyrman úshin qundy derekkóz bolmaq. Sonymen qatar, týyndy — Qytaıdyń halyqaralyq arenadaǵy ustanymdary men rólin saralaýǵa múmkindik beretin mańyzdy eńbek, — dedi Aıda Balaeva.
Kitap Qytaı Halyq Respýblıkasyndaǵy memlekettik basqarý fılosofııasy men tájirıbesine arnalǵan. Onda QHR basshysynyń ishki jáne syrtqy saıasat, ekonomıkalyq jáne áleýmettik damý strategııalary jónindegi kózqarastary qamtylǵan. Basylym saıasattanýshylarǵa, halyqaralyq qatynastar salasynyń mamandaryna, Azııa elderiniń damý jolyna qyzyǵatyn mamandarǵa, sondaı-aq qytaı tili, mádenıeti men qoǵamdyq qurylymyn zertteıtin ǵalymdarǵa arnalǵan.
Osyǵan deıin «Daıdıdaý» ániniń tarıhyna arnalǵan kitap tórt tilde jaryq kórgenin jazdyq.