Astanada «Sı Tszınpın: El basqarý jóninde» kitabynyń besinshi tomy tanystyryldy

«Bir jolda birge júrip, ortaq damýǵa qol jetkizý — Qytaı men Qazaqstannyń taǵdyrlas qaýymdastyǵyn birlesip qurý» taqyrybyndaǵy is-sharany QHR Memlekettik keńesiniń Aqparat keńsesi, Qytaıdyń shet tilderdegi ádebıetterdi basyp shyǵarý jáne taratý basqarmasy jáne Qytaıdyń Qazaqstandaǵy elshiligi birlesip uıymdastyrdy.

Іs-sharaǵa Qazaqstan men Qytaıdyń memlekettik organdarynyń, dıplomatııalyq ókildikteriniń, ǵylymı jáne isker toptarynyń, sondaı-aq buqaralyq aqparat quraldarynyń ókilderi qatysty. Qurmetti qonaqtar qatarynda Qazaqstan Respýblıkasy Prezıdenti Ákimshiliginiń Іshki saıasat bóliminiń meńgerýshisi Ernur Beısenbaev, Qytaı Kommýnıstik partııasy Ortalyq komıteti Nasıhat bóliminiń orynbasary, QHR Memlekettik keńesi Aqparat keńsesiniń basshysy Mo Gaoı jáne Qytaıdyń Qazaqstandaǵy elshiliginiń ýaqytsha senimdi ókili Chen Kefan boldy.

Mo Gaoı besinshi tomǵa QHR tóraǵasy Sı Tszınpınniń 2022 jylǵy mamyrdan 2024 jylǵy jeltoqsanǵa deıingi kezeńdegi 91 mańyzdy eńbegi engenin aıtty. Kitapta qytaılyq jańǵyrýdyń teorııasy men tájirıbesi, sondaı-aq adamzattyń taǵdyrlas qaýymdastyǵyn qurý jónindegi Qytaıdyń ustanymy baıandalǵan.

— Qazaqstan — ejelgi Jibek jolynyń mańyzdy bóligi ári «Jibek joly ekonomıkalyq beldeýi» bastamasy alǵash usynylǵan el. Búginde Qazaqstan «Bir beldeý, bir jol» aıasyndaǵy yntymaqtastyǵy eń belsendi ári nátıjeli damyp kele jatqan memleketterdiń birine aınaldy, — dedi Mo Gaoı.

Ol Qytaıdyń Qazaqstanmen jasandy ıntellekt, tsıfrlyq ekonomıka, aqyldy qalalar jáne jasyl energetıka salalarynda jańa yntymaqtastyq baǵyttaryn damytýǵa daıyn ekenin atap ótti.

Elnur Beısenbaev jańa basylymnyń qazaqstandyq oqyrmandar úshin Qytaıdyń memlekettik basqarý tájirıbesin, saıası damý baǵyty men uzaq merzimdi strategııalyq maqsattaryn tereńirek túsinýge múmkindik beretinin aıtty.

— Qytaı — Qazaqstannyń senimdi dosy, tatý kórshisi jáne strategııalyq áriptesi. Ǵasyrlar boıy qalyptasqan dostyq, ózara qurmet pen senimge negizdelgen qarym-qatynas búginde barlyq baǵytta tabysty damyp keledi, — dedi ol.

Chen Kefan eki el basshylarynyń strategııalyq jetekshiligimen Qazaqstan men Qytaı arasyndaǵy saıası senim nyǵaıyp, saýda-ekonomıkalyq jáne mádenı-gýmanıtarlyq yntymaqtastyqtyń keńeıip kele jatqanyn atap ótti.

— Qytaı men Qazaqstan — senimdi kórshiler, adal dostar jáne jańǵyrý jolynda birge kele jatqan seriktester. Biz kitaptyń besinshi tomynyń jaryq kórýin memlekettik basqarý tájirıbesimen almasýdy tereńdetýge jáne damý strategııalaryn ushtastyrýǵa berilgen jańa múmkindik dep sanaımyz, — dedi dıplomat.

Іs-shara barysynda kitaptardy syıǵa tartý rásimi, sarapshylardyń baıandamalary jáne pikir almasý otyrysy ótti.