Astanada Sırııada áskerı qaqtyǵysty toqtatý máselesi talqylandy

ASTANA. QazAqparat - Búgin Astanada Sırııa daǵdarysyn retteý boıynsha xalyqaralyq texnıkalyq kezdesý ótti. Sonyń nátıjesi boıynsha RF Qarýly Kúshteri Bas shuǵyl basqarma basshysynyń orynbasary, general-maıor Stanıslav Gadjımagomedov málimdeme jasady, dep habarlaıdy QazAqparat tilshisi.

"Búgin, aqpannyń 6-sy kúni Reseı, Túrkııa men Iran delegatsııalary, sondaı-aq Birikken Ulttar Uıymynyń ókilderi Astana qalasynda birlesken toptyń alǵashqy otyrysyn ótkizdi. Atalǵan top qańtardyń 23-24-i kúnderi dál osy jerde Sırııa máselesi boıynsha ótken xalyqaralyq kezdesýdiń nátıjesinde qurylǵan bolatyn. Búgingi otyrystyń qatysýshylary Sırııada áskerı is-qımyldy toqtatý rejımin oryndaý barysyn talqylady. Osy rejımdi tolyǵymen oryndaýǵa qajetti arnaıy baqylaýdy júrgizý, san alýan arandatýshylyq áreketteriniń aldyn alý men atysty toqtatý rejıminiń barlyq talaptaryn oryndaý jaıy sóz boldy. Sondaı-aq qatysýshylar ózara senim sharalaryn pysyqtap, gýmanıtarlyq kómektiń kedergisiz jetkizilý máselesin talqylap shyqty. Delegatsııalar Sırııada áskerı is-qımyldy tolyǵymen toqtatýǵa múddeli ekenderin jetkizdi. Barlyq qatysýshylar Astana protsessin jalǵastyrýǵa arnalǵan talqylaý alańyn usynǵany úshin, sondaı-aq Astanada áskerı is-qımyldardy toqtatý jónindegi birlesken toptyń alǵashqy otyrysyna barlyq jaǵdaı jasaǵany úshin shyn alǵystaryn jetkizdi", - dedi Gadjımagomedov.
 

Osydan keıin Reseı delegatsııasynyń basshysy ýaqyttyń tyǵyzdyǵyn alǵa tartyp, baspasóz máslıxatyn aıaqtaýǵa májbúr ekenin jetkizdi. "Men keshirim suraımyn. Bizde búgin áli biraz sharalar bar. Sondyqtan suraqtar bolsa, Reseı Federatsııasynyń qorǵanys mınıstrligine resmı saýal joldaýyńyzdy suraımyn", - dep atap kórsetti general-maıor.