Astanada Sırııa kelissózderiniń ótkizilýi turaqty sıpatta órbýde - saıasattanýshy

ASTANA. QazAqparat - Elordada Sırııa kelissózderiniń ótkizilýi turaqty sıpatta beleń alyp barady. Mundaı pikirdi Halyqaralyq qatynastar jónindegi eýrazııalyq keńestiń dırektory Janbolat Úsenov bildirdi, dep habarlaıdy QazAqparat.

«Qazirgi ýaqytta Astanada Sırııa ahýalyna qatysty kelissózder ótýde. Bul bizdiń elimizdiń elordasyndaǵy kelissózderdiń osymen tórtinshi kezeńi. ıAǵnı, kelissózder turaqty sıpatta beleń alyp, suhbat alańyna aınalýda. Osy jaıt Qazaqstannyń halyqaralyq «broker» retindegi rólin aıqyndaı túsedi jáne bizdiń bul protseske yqpal etýimizge múmkindik beredi», - dedi Úsenov.

Onyń paıymynsha, Astanadaǵy kelissózderge qarýly oppozıtsııanyń, sonymen birge kepilger elder ókilderiniń qatysýy naqty bir sheshimderdiń qabyldanýyna degen úmitti oıatady. Degenmen birden qarýly qaqtyǵystyń tyıyla  qoıatyndyǵyna senim artýǵa erte.

Úsenov óz sózinde Qazaqstannyń BUU Qaýipsizdik Keńesiniń turaqty emes múshesi bolyp saılanýynyń ózi elimizdiń halyqaralyq «broker» retindegi róliniń álemdik qoǵamdastyq tarabynan moıyndalǵanyn bildiretindigin jáne ol sırııalyq problemada tıimdi jumys isteý múmkinshiligin arttyratyndyǵyn basa aıtty. Qazaqstandyq dıplomatııa dál qazirgi ýaqytta buǵan deıin betpe-bet kelmegen jumystardy atqaryp jatqandyǵyn atap ótti.

Aıta keteıik, buǵan deıin 3-4 mamyr kúnderi Sırııa máselesi boıynsha Astanada ótetin kelissózderge sırııalyq qarýly oppozıtsııanyń qatysatynyn habarlaǵan bolatynbyz.

Sondaı-aq QazAqparat tilshisine Sırııa ahýalyna qatysty pikir bildirgen  saıasattanýshy Ádil Káýkenov Astana kelissózderiniń kezekti kezeńi atysty toqtatý úshin túsinistik tabýǵa múmkindik beretindigin aıtqan ed i.