Astanada Sırııa daǵdarysymen kúres jónindegi qorytyndy deklaratsııaǵa qol qoıyldy (FOTO)
ASTANA. QazAqparat - Astanada Sırııa oppozıtsııasy ókilderi kelissózderiniń ekinshi raýndy aıaqtaldy. 2 qazan kúni bastalǵan kelissózder nátıjesine oraı, Sırııadaǵy daǵdaryspen kúres jónindegi kezdesýdi uıymdastyrýdyń odan arǵy sharalary qamtylǵan qorytyndy deklaratsııaǵa qol qoıyldy.
«Astanada ekinshi márte basqosýǵa múmkindik usynǵany úshin Qazaqstan Respýblıkasy men Prezıdent Nursultan Nazarbaevqa rızashylyǵymdy bildirgim keledi. Birinshi konferentsııada daǵdaryspen kúres boıynsha bastamalardy qamtyǵan birshama qujattarǵa qol qoıylǵan bolatyn. Kelissózderdiń ekinshi raýndynda Sırııadaǵy daǵdarysty shapshańyraq sheshý úshin bastamalar qosylyp otyr», - deıdi Sırııadaǵy plıýralıstik qoǵam úshin qozǵalysynyń basshysy Randa Kassıs.
Aıta keterligi, «Astana-2» kelissózderdiń ekinshi raýndyna qatysýshylar saılaý úderisine erekshe nazar aýdaryp otyr, bul rette saılaýǵa halyqtyń barlyǵy, olardyń elde nemese shet elderde júrgenderine qaramastan barlyǵy da qatysý múmkindigine ıe ekendigine aıryqsha mán berdi.
«Sırııada soǵys toqtamaıynsha bosqyndar máselesi áli de jalǵasa beredi. Bosqyndar aǵynyn toqtatýdyń jalǵyz múmkindigi - qantógisterdi, soǵysty toqtatý. Sırııalyq qoǵamnyń basym bóligi saıası sheshim, ádildik arqyly ǵana osyny júzege asyrýǵa bolady degen pikirde», - deıdi sırııalyq oppozıtsııanyń taǵy bir ókili Bassam a Bıtar.
Kelissózderdiń ekinshi raýndyna 37 adam qatysty. Konferentsııa barysynda sırııalyq daǵdarysqa qatysty túrli saıası sheshimder usynylǵan. «Biz tezirek sheshim taýyp, sırııalyq daǵdarysty beıbit jolmen aıaqtaýǵa úmittimiz», - dep túıindeıdi Abdýlla Abdýlsaııd.
Eske sala keteıik, Astanada 25-27 mamyr aralyǵynda sırııalyq daǵdarys boıynsha Sırııa oppozıtsııasynyń túrli toptarynan ókilder arasynda kezdesýler ótip, onyń nátıjesinde saıası sheshimder jónindegi Astana deklaratsııasyna qol qoıylǵan bolatyn. Atap aıtqanda, qujatta qatysýshylardyń basym bóligi barlyq sheteldik sodyrlardy elden shyǵarýǵa shaqyryp, terrorızmmen kúreste birlesken maıdan qurýdyń qajettigin moıyndaǵan bolatyn.
