Astanada Syr óńiriniń jármeńkesi ótip jatyr
ASTANA. KAZINFORM — Qyrkúıektiń 13-14 -i kúnderi Astana qalasynda Qyzylorda oblysy taýar óndirýshileriniń qatysýymen aýyl sharýashylyǵy ónimderiniń jármeńkesi uıymdastyrylyp jatyr.
Jármeńkege 50 júk kóligine tıelgen 60-qa jýyq taýaróndirýshiniń quny 200 mln. teńge bolatyn 500 tonnaǵa jýyq ónimi ákelingen.
Atap aıtqanda, 200 tonnadan astam kúrish, 10 tonna et, 20 tonnadaı balyq, 160 tonna baqsha ónimderi, 80 tonnadan astam kókónis pen jemis-jıdek, 15 tonnaǵa jýyq sút jáne kondıter ónimderi, 5 tonna as tuzy jetkizildi.
Sondaı-aq, jármeńke aıasynda Syr eliniń ónerpazdary qatysqan mádenı-tanymdyq kontserttik baǵdarlama elordalyqtarǵa erekshe kóńil-kúı syılady.
Memlekettik qoldaýdyń arqasynda aımaqtyń aýyl sharýashylyǵy salasy qarqyndy damyp keledi. Básekege qabiletti ónim óndirý arqyly azyq-túlik qaýipsizdigin qamtamasyz etý jolǵa qoıylǵan.
Osy jyldyń 7 aıynda aýyl sharýashylyǵynda 46,5 mlrd. teńgeniń ónimi óndirilip, ósim kórsetkishi 2,6%-ǵa artty.
Oblys boıynsha 189,6 myń gektarǵa aýyl sharýashylyǵy daqyldary egildi, atap aıtsaq, dándi daqyldar 92,9 myń gektar, maıly daqyldar 5,7 myń gektar, mal azyqtyq daqyldar 73,3 myń gektar, kartop, kókónis, baqsha 17,4 myń gektar. Úkimet bekitken Jol kartasyna sáıkes 80,9 myń gektar jerge kúrish sebildi.
Sharýashylyqtar egin jınaýǵa qajetti aýyl sharýashylyǵy tehnıkalarymen, janar-jaǵarmaımen, mıneraldy tyńaıtqyshtarmen tolyq qamtamasyz etilgen.
Búginde egin jınaý naýqany qarqyndy júrgizilip jatyr. Erte egilgen dándi daqyldar tolyq jınalyp bitti. Qazirgi tańda mal azyqtyq, maıly daqyldarmen qatar kókónis, baqsha jáne kúrish jınalyp jatyr.
Aımaqta mal sharýashylyǵyn damytýǵa jasalǵan qoldaýdyń nátıjesinde tórt túlik mal basy ósip, ónim óndirý ulǵaıdy.
Oblys boıynsha 2025 jyldyń 1 tamyzyna 425,4 myń bas iri qara, 830,3 myń bas qoı men eshki, 270,7 myń bas jylqy, 66,0 myń bas túıe jáne 126,8 myń bas qus tirkelgen. Ótken jyldyń sáıkes kezeńimen salystyrǵanda iri qara 0,5%-ǵa, jylqy 9,7%-ǵa, túıe 1,2%-ǵa, qus 1,2%-ǵa artty.
Óńirde aýyl sharýashylyǵy ónimderiniń eksporty qarqyndy damyp keledi. Bıyl oblystan quny 18,8 mln. dollardy quraıtyn 37,7 myń tonna ónim álemniń 19 memleketine eksporttaldy.
Barlyq eksporttalǵan ónimniń 89,4 paıyzyn quraıtyn kúrish ónimi Reseı, Belarýs, Qyrǵyzstan, Tájikstan, Ýkraına, Ázerbaıjan, Ózbekstan, Grýzııa, Mońǵolııa jáne Irak memleketterine jiberildi.
Azyq-túlik qaýipsizdigin qamtamasyz etý maqsatynda aımaqta ınvestjobalardyń jol kartasy ázirlenip, jalpy quny 57,1 mlrd teńgeni quraıtyn 30 jobany iske asyrý josparlanýda. Bul jobalar óńir ekonomıkasyn odan ári órkendetýge baǵyttalǵan.