Astanada Sıngapýr mektebi salynady
ASTANA. QazAqparat - Astanada «Rýhanı jańǵyrý» baǵdarlamasy aıasynda 1500 oqýshyǵa arnalǵan Sıngapýr mektebi salynady, dep habarlaıdy QazAqparat "Elorda Infoǵa" silteme jasap.
«Astana» áleýmettik-kásipkerlik korporatsııasynyń basqarma tóraǵasy Nurlan Jaqypovtyń aıtýynsha, Mektep Sıngapýr modeli boıynsha 1500 oqýshyǵa arnalyp salynbaq. Mektep úsh bólikten turady. Biri bastaýysh mektep, taǵy biri orta mektep bolsa, úshinshi bóligi bitirýshi synyptarǵa arnalady. Balalar mektep aýmaǵyndaǵy kampýsta turady dep josparnalýda.
Onyń aıtýynsha, mektep sońǵy úlgidegi tehnıkalarmen jabdyqtalady. Sondaı-aq, oqýshylardy sheteldik ustazdar oqytatyn bolady. Ázirge Sıngapýr mektebi jobasynyń quny men ınvestory týraly aqparat jarııa etilgen joq.
«Atalǵan joba ÁÁK strategııasyna saı. Ol, bir jaǵynan, áleýmettik joba bolyp tabylady, ekinshi jaǵynan bilim berý salasyna úzdik halyqaralyq tájirıbeni tartýǵa, qaladaǵy bilim berý deńgeıin arttyrýǵa múmkindik beredi», - dedi Nurlan Jaqypov.
