Silk Way Star jobasynyń anonsy QTJ ǵımaratynyń ekranynan kórsetildi

ASTANA. KAZINFORM — El astanasynda halyqaralyq mýzykalyq joba — Silk Way Star konkýrsynyń aýqymdy nasıhat kampanııasy bastaldy. Endi qala turǵyndary men qonaqtary baıqaýdyń anonstaryn Qazaqstan temir joly ǵımaratynyń úlken LED-ekranynan kóre alady.

Aıta keteıik, Silk Way Star-dyń alǵashqy shyǵarylymy 20 qyrkúıek kúni saǵat 20:00–de Jibek Joly telearnasynda tikeleı efırde kórsetiledi.

Joba Uly Jibek jolynyń boıyndaǵy 12 elden — Ázerbaıjannan bastap Ońtústik Koreıaǵa deıingi keńistikten kelgen ártisterdi biriktirdi.

Shoýdyń baǵdarlamasynda baıqaý tapsyrmalary, krossmádenı dýetter, ondaǵan tildegi ánder jáne mýltıkýltýralyq formattaǵy alǵashqy juldyzdy anyqtaıtyn gala-kontsert qarastyrylǵan.

Qazaqstan atynan baıqaýǵa ánshi Alem qatysady.

Buǵan deıin Armenııadan kelgen mýzykant Saro Gevorgıan konkýrs týraly óz áserimen bólisip, «Silk Way Star — bul jaı ǵana baıqaý emes, mádenı kópir» dep atap ótken bolatyn.