Astanada ShYU-ǵa múshe memleketter Joǵarǵy sottary tóraǵalarynyń kezekti toǵyzynshy keńesi ótti

Bul is-shara 2006 jyldan bastap, jyl saıyn ShYU-ǵa múshe elderdiń birinde kezegimen ótkizilip keledi. Keńes jumysyna Qytaı Halyq Respýblıkasy Joǵarǵy Halyqtyq Sot Tóraǵasy Chjoý Tsıan, Reseı Federatsııasy Joǵarǵy Sot Tóraǵasy V.M.Lebedev, Qyrǵyz Respýblıkasy Joǵarǵy Sot Tóraǵasy F.Z.Djamasheva, Tájikstan Respýblıkasy Joǵarǵy Sot Tóraǵasy N.Abdýllozoda, Ózbekstan Respýblıkasy Joǵarǵy Sot Tóraǵasy Sh.A.Gazıev qatysty. Keńeske ShYU-nyń Bas hatshysy D.F.Mezentsev, BUU Kontrterrorıstik komıteti Atqarýshy dırektoratynyń atqarýshy dırektory Jan-Pol Labord, ShYU Terrorızmge qarsy aımaqtyq qurylymy atqarýshy komıteti dırektorynyń orynbasary T.D.Musabaev arnaıy meıman retinde shaqyryldy.

Qazaqstan Respýblıkasynyń Prezıdenti N.Á.Nazarbaevtyń keńeske qatysýshylarǵa arnalǵan quttyqtaý sózin Qazaqstan Respýblıkasynyń Memlekettik hatshysy Ádilbek Jaqsybekov oqydy. Onda: «Qazirgi tańda Shanhaı Yntymaqtastyq Uıymy óńirdegi beıbitshilikti, qaýipsizdik pen turaqtylyqty qamtamasyz etýge járdemdesetin halyqaralyq qaýymdastyqtaǵy eń yqpaldy uıymdardyń biri retinde moıyndalyp otyr. Qazaqstan Shanhaı Yntymaqtastyq Uıymyna múshe memleketterdiń sot organdarynyń quqyqtyq aqparat almasý, adam quqyqtaryn qorǵaý jáne quqyq ústemdigin nyǵaıtý salasyndaǵy yntymaqtastyǵyn keńeıtý máselelerine aıryqsha nazar aýdaryp keledi», - delingen.

Syndarly dostyq jáne ózara túsinistik jaǵdaıynda ótken kezdesý barysynda taraptar taýarlardyń kedendik qunyn anyqtaý, nekeni buzý týraly ister jónindegi sot praktıkasy máseleleri boıynsha ózara is-qımyl men tájirıbe almasý jáne atalǵan sanattaǵy ister boıynsha sot sheshimderin oryndaý, sottardyń qyzmetin jetildirý jáne baǵalaý, sottardy teńgermeli basqarý júıesin qurý, sýdıalardy irikteý men taǵaıyndaý júıesi, sot tóreliginiń ashyqtyǵy, sot qyzmetinde aqparattyq-kommýnıkatsııalyq tehnologııalardy engizý týraly mańyzdy máselelerdi talqylady. Terrorızmmen kúrestegi joǵarǵy sot sýdıalarynyń róli jeke semınar aıasynda qaraldy.

Talqylaý qorytyndysy boıynsha ShYU-na múshe memleketter Joǵarǵy sottary tóraǵalarynyń quqyq ústemdigin birlese ilgeriletý, sondaı-aq adam quqyqtary men negizgi bostandyqtaryn qorǵaý maqsatynda ózara is-qımyl men seriktestikti kúsheıtý jónindegi toǵyzynshy keńesiniń birlesken málimdemesine qol qoıyldy.