Astanada shyny-áınekter jınaıtyn konteınerler qoıylady
ASTANA. QazAqparat - Elordalyq bılik pen úkimettik emes uıymdar astanalyqtarǵa paıdalanylǵan shyny buıymdardy bólek konteınerlerge tastaýdy úıretýge múddeli. Osy rette búgin Astana qalasy Esil aýdanynyń ákimdiginde EXPO-2017 kórmesin uıymdastyrý dırektsııasy, «Efes Qazaqstan» kompanııasy jáne «PosadiDerevo.kz» qoǵamdyq birlestigi qatysqan úshjaqty memorandýmǵa qol qoıyldy.
Qujat áınek qaldyqtaryn jınap, olardy ekinshi márte óńdeý jobasyn iske asyrýǵa negizdelgen. Bastamashylar osy rette qaladaǵy 20 turǵyn úı keshenderiniń aýlasyna synaby bar lampalardy jınaýǵa arnalǵan qoraptarǵa uqsas konteınerler qoıýdy kózdep otyr.
Jobanyń quny 20 mln. teńgege baǵalanyp otyr, onyń ishine konteınerler satyp alý, tasymaldaý qyzmetin tóleý jáne úgit-nasıhat jumystary kiredi. Joba avtorlarynyń aıtýynsha, jobanyń negizgi bóligi osy bastamany halyqqa jetkizý bolmaq. Osy oraıda aqparattyq-túsindirý naýqandary uıymdastyrylyp, úılerdiń kireberisterine, avtobýs aıaldamalaryna, qoǵamdyq kólikterge aqparattyq materıaldar ilinip, televızııadan jarnamalar taratylmaq.
