Astanada Shyǵys taǵamdarynyń gastronomııalyq kórmesi ótti
ASTANA. QazAqparat - Qazaqstandaǵy Ózbekstan týrızmi jyly aıasynda Shyǵys taǵamdarynyń gastronomııalyq kórmesi ótti, dep habarlaıdy QazAqparat tilshisi
Taǵamdar kórmesinde Elorda turǵyndary men qonaqtarynyń nazaryna qazaq jáne ózbek ultynyń taǵamdary usynyldy. Atap aıtqanda, et asylyp, býy burqyraǵan palaýdyń birneshe túri, qýyrdaq, kabob, dolma, baýyrsaq, samsa, tandyr jáne taǵy basqa as túrleri ázirlendi.
Odan bólek, astanalyq meıramhanalardyń bas aspazdary men kórmege Ózbekstannan arnaıy kelgen 4 aspaz kópshilik aldynda dámdi taǵam daıyndaýdyń qupııasymen bólisip, sheberlik sabaqtaryn ótkizdi.
Qala halqy aspazdar daıyndaǵan taǵamdardan dám tatty. Kúnshýaqty Ózbekstannyń kórmesin tamashalaýshylarǵa 1 myńnan astam ystyq tandyr nan men tátti kısh-mısh meıizi taratyldy. Al tegin degýstatsııalar men arnaıy baıqaýlar kórmeniń kórigin qyzdyrsa, ásem án men kórkem bı kórermenderge ádemi kóńil kúı syılady. Oǵan qosa, alańda Shyǵys bazary, «As ıesimen dámdi» atty utys oıyny uıymdastyryldy. 
Uıymdastyrýshylardyń aıtýynsha, atalǵan shara óz kezeginde eki el arasyndaǵy erteden kele jatqan baýyrlastyq qarym-qatynas pen ekijaqty týrızmdi damytýda mańyzdy ról atqarady.
Gastrokórmeni QR Mádenıet jáne sport mınıstrliginiń qoldaýymen «Kazakh Tourism» UK» AQ uıymdastyrdy. 
