Astanada «Shyǵys Qazaqstannyń mýzykalyq murasy» antologııasy tanystyryldy
ASTANA. 16 mamyr. QazAqparat - Búgin Astanada "Shyǵys Qazaqstannyń mýzykalyq murasy" antologııasy kópshilik nazaryna usynyldy.
Jınaqty shyǵystyń kúı jáne ánshilik mol murasyn urpaqqa úzbeı jetkizý maqsatynda Shyǵys Qazaqstan oblysynyń ákimi Berdibek Saparbaevtyń tikeleı atsalysýymen ShQO mádenıet basqarmasy jáne ShQO memlekettik fılarmonııasy jaryqqa shyǵaryp otyr. Ondaǵy mýzykalyq shyǵarmalar 18 aýdıo dıskiden turady.
"Qazaqtyń án ónerin asqaqtatyp júrgen Erkin Shúkimánov, Klara Tólenbaeva, Erlan Rysqalı ónerpazdardy osy jumysqa tarttyq. Munda tanymal ándermen qatar, buryn aıtylǵan, biraq keıinnen aıtylmaı ketken eski ánder de bar. Mysaly, ata-ájelerimizdiń aýzynda qalyp ketken de, biraq búgin sahnada oryndalmaı júrgen án men kúıler bar, sonyń barlyǵyn betiniń shańyn qaǵyp, osy jınaqqa engizdik. Izdestirý jumystary biraz ýaqytqa sozyldy. Sosyn Shyǵys Qazaqstan óńiri ózge eldermen shektesip jatqan Baıan Ólgeı jáne Qytaı qazaqtarynyń bizdiń dástúr saqtalǵan. Biz estimegen jyrlar jeterlik. Olardyń barlyǵyn qamtýǵa tyrystyq. Qazaqstannyń shyǵys aımaǵyna jatatyn án-kúı dástúriniń barlyq týyndylaryn qamtýǵa kúsh saldyq", - dedi Shyǵys Qazaqstan oblysynyń Mádenıet basqarmasynyń bastyǵy Jaqsylyq Omar.
Onyń aıtýynsha, qajetti materıaldardy taýyp, bir jınaqqa toptastyrýǵa bir jylǵa jýyq ýaqyt ketken. Jarııalanǵan dúnıe endi ShQO-daǵy barlyq 400-ge tarta kitaphanasyna tegin taratylady. Sonymen qatar óńirdegi mektepterge jáne mýzykalyq kolledjderge beriledi.
