Astanada Shyǵys Qazaqstan ónimderiniń jármeńkesi ótip jatyr
ASTANA. QazAqparat - Shyǵys Qazaqstannyń óndirýshileri Astanadaǵy aýyl sharýashylyǵy jármeńkesine 300 tonnaǵa jýyq ónim ákeldi, dep habarlaıdy QazAqparat tilshisi aqparat ortalyǵyna silteme jasaı otyryp.
«Qazaqstan» sport kesheni aýmaǵynda 50 saýda orny belgilengen, onda Shyǵys Qazaqstan oblysynyń 2 qalasy men 15 aýdanynan kelgen óńdeýshi ónerkásip pen sharýa qojalyqtary elorda turǵyndaryna óz ónimderin usynyp otyr. Astanalyqtar qoljetimdi baǵamen kókónis, irimshik, qymyz, ósimdik maıyn, qaraqumyq, asburshaq, jylqy etin, súzbe, qaımaq, shujyq pen balyq satyp ala alady. Sondaı-aq, Shyǵys Qazaqstannyń brendine aınalǵan bal men maraldyń múıizinen jasalǵan ónimder de ákelindi. 
Shyǵys Qazaqstan oblysy ónimderiniń jármeńkesi Astananyń 20 jyldyǵy aıasynda ótip jatyr. Uıymdastyrýshylardyń aıtýynsha, 210 mln teńge somaǵa 300 tonnaǵa jýyq ekologııalyq taza ónim usynylǵan.
Barlyq taýar elordadaǵydan 15-20 % arzanǵa satylyp jatyr. Astana turǵyndary Shyǵys Qazaqstan oblysynyń jármeńkesine sapaly ári tabıǵı ónim alý úshin keledi. 
«Shyǵys Qazaqstandy da, osy óńirdiń ónimderin de jaqsy kóremiz. Sondyqtan, ınternetten habarlandyrýdy kórgen kezde qajetti taýarlardyń tizimin jasaýǵa kiristik. Taýar sapasyna senimdimiz. Maı, qymyz ben tary satyp aldyq. Bári dámdi», - dep atap ótti elorda turǵyny Aısulý Qabıdolla.
Astanalyqtar ásirese shyǵystyń balyna erekshe qyzyǵýshylyq tanytýda.
«Men 10 lıtr bal satyp aldym. Sonymen birge, kartop ta aldym. Bizdiń úıdiń janynda kartop 150 teńge turady, al munda 70 teńge. Bári arzan. Bizdiń bazardaǵylardan áldeqaıda jaqsy», - dedi Sánııa Keıinbaeva. 
Saýdamen qatar, óńir shyǵarmashylyq ujymdarynyń kontserti de ótip jatyr.
Eske sala keteıik, Astanada jármeńke 29-30 qyrkúıek kúnderi saǵat 9.00-den 18.00-ge deıin Qajymuqan kóshesi, 7 mekenjaıynda ótedi.
