Astanada shyǵarmashyl jastardyń XVII «Shabyt» halyqaralyq festıvali bastaldy
ASTANA. QazAqparat - Astana qalasynyń Beıbitshilik jáne kelisim saraıynda búgin shyǵarmashyl jastardyń «Shabyt» XVII halyqaralyq festıvali bastaldy, dep habarlady uıymdastyrýshylar.
«Bul jolǵy festıval osyǵan deıingilerinen erekshelenedi. Bıylǵy jyly «halyqtyq mýzyka» jáne «kameralyq hor» degen atalymdar engizildi. Osylaısha, shyǵarmashyl talantar úshin ózderin kórermender aldynda osy baǵyttarda tanytýdyń úlken múmkindigi berilip otyr», - delingen habarlamada. Baıqaý uıymdastyrýshylarynyń sózine qaraǵanda, «halyqtyq mýzyka» atalymy boıynsha qatysýǵa kórshiles Qytaı elinde turatyn qazaq jastarynan túsken ótinishter sany kóp. Qytaıdan kelgen qandastarymyz Halyqaralyq festıvalde ózderiniń shyǵarmashylyq qabiletteri men sheberlikterin sazsyrnaı, sybyzǵy, naı sııaqty úrmeli halyq aspaptary arqyly tanytpaq. «Shabyt» festıvaline qatysýǵa tilek bildirýshilerdiń arasynda elimizdiń barlyq aımaqtarynan Soltústik Qazaqstan oblysy men Shymkent óńiri kósh bastap tur. Atalǵan baıqaýda kelesi marapattar anyqtalǵan: basty syılyq - Qazaqstan Respýblıkasy Prezıdentiniń Kýbogi; Gran-prı; «Laýreat» ataǵyn berýmen 1,2,3 syılyqtar, «Shabyt» medaldary. «Shabyt» shyǵarmashyl jastardyń halyqaralyq konkýrsynyń «dıplomanty» ataǵyn alý jas talanttarǵa úlken sahnaǵa shyǵýǵa múmkindik beredi. Festıvaldiń mańyzdy bóligi - álemdik óner sheberleriniń qatysýymen ótetin sheberlik synyptary. Festıval onyń jeńimpazdary marapattalatyn gala-kontsertpen aıaqtalady. Sharany Astana qalasynyń ákimdigi, Astananyń Mádenıet basqarmasy, Qazaq Ulttyq óner ýnıversıteti uıymdastyrdy. Esterińizge sala keteıik, «Shabyt» shyǵarmashyl jastardyń 17-shi halyqaralyq festıvali 3-8 qarasha aralyǵynda ótedi.
