Astanada shybyn-shirkeıge qarsy dárileý jumystary bastaldy
ASTANA. QazAqparat - Búgin 22:30 - 00.00 aralyǵynda qala aýmaǵynda masa men kenege qarsy dárileý jumystary júrgiziledi. Bul týraly elorda ákimdiginiń baspasóz qyzmeti sanıtarlyq-epıdemıologııalyq stantsııaǵa silteme jasap habarlady.
«Qalalyq Qoǵamdyq densaýlyq saqtaý basqarmasy Astana aýmaǵynda shybyn-shirkeı men masalarǵa qarsy dárileý jumystarynyń bastalǵanyn habarlaıdy. Aýa raıy jylynǵan soń, masalardyń jappaı kóbeıýine jol bermeý úshin qala mańyndaǵy kishigirim sý aıdyndarynda masa dernásilderine qarsy kúres bastalady. Dárileý jumystary qazan aıyna deıin jalǵasady», - delingen sanıtarlyq-epıdemıologııalyq stantsııa jibergen habarlamada.
Sondaı-aq, sanıtarlyq-epıdemıologııalyq stantsııa dárileý jumystary turǵyn úılerdiń jertólelerinde qatar júrgizilýi tıis ekenin eskertti.
«Shybyn-shirkeıge qarsy dárileý qyzmeti Páter ıeleri kooperatıviniń eksplýatatsııalyq shyǵyndaryna kiredi. Sol sebepti, PIK, JShS, JK tóraǵasynan jertólelerdi dárileýdi talap etý qajet», - dep málimdedi SES.
Qala aýmaǵynda dárileý jumystaryn júrgizý úshin mehanıkalyq rotorlyq búrikkishter, arnaıy mashınalar qoldanylady. Ózge eldi mekenderden jándikterdiń ushyp kelýine tosqaýyl qoıý úshin termogenerator arqyly tuman tárizdes býlaý jumystary júrgiziledi.
Foto: topklop.ru
