Astanada short-trekten qysqy jastar oıyndary máresine jetti
ASTANA. QazAqparat – Astanada short-trekten QR ІV qysqy jastar oıyndary máresine jetti, dep habarlaıdy QazAqparat tilshisi.
Short-trekten BQO quramasynyń aǵa bapkeri, Qazaqstannyń eńbek sińirgen jattyqtyrýshysy Maksım Lozovoıdyń málim etkenindeı, atalmysh jarysqa elimizdiń oblystary men qalalarynan 11 komanda qatysyp, baq synady.
Birneshe kúnge sozylǵan saıys qorytyndysynda jalpy esepte 838 upaı jınaǵan BQO quramasy úzdik shyqty. Qostanaılyqtar (726 upaı) ekinshi, astanalyqtar úshinshi (557 upaı) orynǵa ıe boldy.
M.Lozovoıdyń aıtýynsha, batysqazaqstandyqtardan Alına Ájiǵalıeva men Maqsat Ýálıýlla 1500 metr qashyqtyqta chempıon atandy. Sondaı-aq Alına 500 metrde de máre syzyǵyn birinshi bolyp qısa, Meıirjan Tólegen osy qashyqtyqta kúmis aldy. Esesine 1 myń metrde Meıirjan altyn medalmen marapattalsa, M.Ýálıýlla men A.Ájiǵalıeva ekinshi orynǵa kóterildi.
Batysqazaqstandyqtar (Maqsat Ýálıýlla, Meıirjan Tólegen, Álıhan Qanat, Álibı Álimgereev, Madııar Madıhov) 2 myń metrlik estafetada aldyna jan salmady. Al qyzdar (Alına Ájiǵalıeva, Nargız Omarova, Gúldana Jalmuhan, Málıka Joltabar, Aelıta Nabet) kúmispen kúpteldi. Aralas estafetadan BQO komandasy taǵy bir kúmis medaldi jeńip aldy.
«Osylaısha, short-trekten 2022-2023 jylǵy maýsym qorytyndylandy. Batysqazaqstandyq jasóspirim shorttrekshiler halyqaralyq jarystarda da jeńisterimen kózge tústi. Mysaly, Meıirjan Tólegen Reseıdiń Kemerovo qalasynda ótken «Azııa balalary» oıyndarynda altyn men kúmis alsa, Madııar Madıhov pen Málıka Joltabar qola júldege ıe boldy. Batysqazaqstandyqtar Kemerovoda Qazaqstan quramasy sapynda estafetalyq synda da júldege ilikti», dedi QazAqparat tilshisine Maksım Lozovoı.
Eske sala keteıik, budan buryn qazaqstandyq shorttrekshiniń «Azııa balalary» oıyndarynyń chempıony atanǵanyn jazǵan bolatynbyz.
