Astanada short-trekten Qazaqstan chempıonaty bastaldy
ASTANA. QazAqparat - Keshe Astanada short-trekten Qazaqstan chempıonaty bastaldy. El birinshiligine jalpy esebi 88 sportshy qatysýda, dep habarlaıdy QazAqparat Ulttyq olımpıada komıtetiniń baspasóz qyzmetine silteme jasap.
Qazaqstan chempıonatyna Almaty, Astana, Shymkent qalalary men Qostanaı, Qaraǵandy, Pavlodar, Batys Qazaqstan jáne Shyǵys Qazaqstan oblystarynan sportshylar jınaldy.
Sondaı-aq, Abzal Ájiǵalıev, Nurbergen Jumaǵazıev, Denıs Nıkısha syndy ulttyq quramanyń úzdikteri de birinshilikten syrt qalmaǵan.
«Búgin bárimiz Astanadaǵy ulttyq chempıonatqa jınalyp otyrmyz. Bul maýsymdaǵy sońǵy resmı jarys. Osydan soń azdaǵan úzilis alyp, jańa kezeńge daıyndyqty bastaımyz. «Alaý» muz aıdyny biz úshin óte qolaıly. Munda joǵary nátıje tirkeýge múmkindik bar», - deıdi ulttyq qurama múshesi Erkebulan Shamuhanov.
Aıaǵynyń jaraqatyna baılanysty álem chempıonaty men kýboktik dodalarǵa qatyspaǵan Abzal Ájiǵalıev qatarǵa oraldy.
«Jańa maýsym men úshin sátti bastalǵan edi. Álem kýbogi kezeńderinde úzdikter qatarynan kórindim. Degenmen, aıaqtaǵy jaraqatym ári qaraı da joǵary nátıje kórsetýge múmkindik bermedi. Sol sebepti, biraz úzilis alyp, densaýlyǵymdy retken keltirdim. Qazaqstan chempıonatynda komandalyq synda jáne estafetada baq synaımyn. Jekelegen qashyqtyqtarǵa áli de daıyn emespin», - deıdi Abzal.
Aıta ketý kerek, short-trekten Qazaqstan chempıonaty 18-20 naýryz aralyǵynda ótedi.
