Astanada shomylý maýsymy bastalǵaly 4 bala sýǵa ketti

NUR-SULTAN. QazAqparat – Nur-Sultan qalasynyń aýmaǵynda shomylý kezeńi bastalǵaly kámeletke tolmaǵan 4 bala sýǵa batyp ketti, dep habarlaıdy QazAqparat Polıtsııa departamentiniń baspasóz qyzmetine silteme jasap.

«Sýǵa shomylý maýsymy bastalǵannan beri sýǵa batqan adamdar sany artyp otyr. Onyń ishinde, ásirese, balalarmen bolatyn qaıǵyly jaǵdaılar bar. Sýǵa shomylý kezindegi qarapaıym qaýipsizdik erejelerin balalardyń biri bilse, biri bile bermeıdi. Bilse de durys saqtamaıdy. Balalar turmaq, úlkenderdiń ózi qaýipsizdik erejelerine asa qatty mán bere bermeıtin jaǵdaılar kezdesedi. Sonyń saldarynan ártúrli oqys jaǵdaılar bolady. Elorda aýmaǵynda shomylý kezeńi bastalǵaly beri kámeletke tolmaǵan 4 bala sýǵa ketip qaza boldy», - dedi polıtsııadan.

Vedomstvo baspasóz qyzmetinen atap ótkendeı, balalardyń eresekter qadaǵalaýynsyz jáne belgilenbegen oryndarda shomylýyna jol bermeý kerek.