Astanada shomylý maýsymy ashyldy
ASTANA. QazAqparat - Astanada dástúrge saı maýsymnyń birinde shomylý maýsymy ashyldy. Búgin «Esil» ózeniniń jaǵalaýynda TJ departamenti qyzyl jarty aı qoǵamynyń eriktileri, óńirlik aeromobıldi shuǵyl-qutqarý otrıadynyń mamandarymen birlesip «Biz sýdaǵy qaýipsizdikti qoldaımyz» atty aýqymdy aktsııa ótkizdi. Shara sý qoımalaryndaǵy qaıǵyly jaǵdaılardyń aldyn alý ári eskertý maqsatynda uıymdastyrylyp otyr, dep habarldaıdy Astana qalasynyń ákimdiginiń saıty.
Qutqarýshylar men eriktiler sýǵa batyp bara jatqan adamdy qalaı qutqarý kerektigi men alǵashqy kómek kórsetýdiń tásilderin kórsetti. Budan bólek aktsııaǵa qatysýshy 200-ge jýyq uldar men qyzdar shomylý maýsymy taqyrybyna saı fleshmob uıymdastyrdy.
Aktsııa shartyna saı eriktiler úsh topqa bólindi. Qutqarý otrıadynyń qutqarýshylary, medıtsına ortalyǵynyń dárigerleri, psıhologtardyń jetekshiligimen qatysýshylar sýdaǵy qaýipsizdikti saqtaýǵa shaqyratyn «Biz sýdaǵy qaýipsizdikti qoldaımyz» transparanttar men plakattar jáne únparaqtarmen Esil ózeniniń jaǵasynda jaıaý júrip ótti.
Fleshmobqa qatysýshylar men belsendilerge uıymdastyrýshylar atynan alǵys hattar men sývenırler tabystaldy.
TJD mamandary jazǵy maýsym bastalysymen sýdaǵy qaıǵyly jaǵdaılardyń artatynyn eskertedi. Qarapaıym erejelerdi eskermeý saldarynan sýǵa batyp ketý oqıǵalary oryn alyp jatady. Bul óte kúrdeli másele.
Statıstıkanyń málimetine súıensek, sýdaǵy qaıǵyly jaǵdaılardyń 70% alkogoldi ishimdiktiń saldary. Sýǵa ketýdiń 98% astam sebebi - jabdyqtalmaǵan jáne tyıym salynǵan jerlerde shomylý. Jaǵajaılarda da erejeni umytpaǵan jón. Kún ystyq kezderi 1000 adamǵa deıin demalady. Sol sebepten «Sýdaǵy erejelerdi saqtaý» tártibine baǵyný ári onyń saqtalýyna mán berý arqyly qaýipsiz demalys uıymdastyrýǵa bolady.
