Astanada shomylýǵa arnalǵan bes oryn belgilengen
ASTANA. KAZINFORM — Astana qalasynyń Tótenshe jaǵdaılar departamenti shomylý maýsymynyń bastalýyna baılanysty sý aıdyndarynda qaýipsizdikti qamtamasyz etý boıynsha profılaktıkalyq jáne jedel is-sharalardy kúsheıtti.
Qazirgi ýaqytta qutqarýshylar kún saıyn Esil ózeninde patrýldeý júrgizedi, al qaýipti ýchaskelerde úsh mobıldi qutqarý beketiniń jumysy uıymdastyrylǵan.
Turǵyndar men qala qonaqtarynyń qaýipsiz demalysy úshin shomylýǵa arnalǵan resmı bes oryn belgilengen. Jabdyqtalmaǵan jáne qaýipti ýchaskelerde shomylýǵa tyıym salynǵany týraly eskertý belgileri ornatylǵan.
— Sýdaǵy jazataıym oqıǵalardyń basym bóligi shomylýǵa arnalmaǵan oryndarda bolady. Sondyqtan turǵyndar men qala qonaqtaryn tek resmı jaǵajaılarda demalýǵa, balalardy qaraýsyz qaldyrmaýǵa jáne mas kúıinde sýǵa túspeýge shaqyramyz, — dedi Astana qalasy TJD Tótenshe jaǵdaılardy joıý basqarmasynyń bastyǵy Baýyrjan Ahmetalın.
Sý aıdyndaryndaǵy qaýipsizdik qaǵıdalaryn buzǵany úshin ákimshilik jaýapkershilik qarastyrylǵan. Ótken shomylý maýsymynda júrgizilgen reıdtik is-sharalar barysynda TJD qyzmetkerleri 176 ákimshilik hattama toltyrdy.
Astana qalasynyń Tótenshe jaǵdaılar departamenti azamattardy qaýipsizdik sharalaryn saqtaýǵa jáne óz ómiri men jaqyndarynyń qaýipsizdigine jaýapkershilikpen qaraýǵa shaqyrady.
Aıta ketelik elimizde shomylý maýsymy bastalǵan edi.
