Astanada ShQO-nyń «Etnoaýyl» ulttyq-mádenı kesheni usynyldy
ÓSKEMEN. QazAqparat - Astanada Shyǵys Qazaqstan kúnderi aıasynda «Etnoaýyl» ulttyq-mádenı kesheni usynyldy, dep habarlaıdy «QazAqparat» HAA tilshisi.
Etnoaýyl Shyǵys Qazaqstan sheberleriniń qolóner buıymdarymen toltyrylyp, sándik qoldanbaly óner sheberleriniń qoldarynan shyqqan kıiz, teri, aǵash buıymdary elorda jurtshylyǵynyń tańdanysyn týǵyzdy. Sonymen qatar, kórme túsinde kilem toqý óneri, quraq quraý, shı órý jáne kıiz basýdan sheberlik synyptary uıymdastyryldy.
Dál osy alańda óńirdegi óner maıtalmandarynyń qatysýymen Ámire Qashaýbaev atyndaǵy fılarmonııa ártisteriniń teatrlandyrylǵan qoıylymdary kórsetildi. Etnıkalyq atmosferaǵa ulttyq sport túrleri de óń berdi. Shyǵysqazaqstandyqtar kókpar, toǵyzqumalaq, aýdaryspaq, qyz qýý, asyq atý, qazaq kúresi, teńge ilý, jamby atý syndy kóshpendilerdiń kóne oıyndaryna ózderiniń eptiligin kórsetti.
Munda aýdaryspaq boıynsha Qazaqstannyń bes dúrkin chempıony Ermek Japıshev, qazaqsha kúres boıynsha Qazaqstan chempıony Erzat Arǵynov, Ádil Tókeshov, Farhat Qaıyrbekov jáne Aıbek Aǵybaevtar óner kórsetti.Ulttyq sport túrlerin kórsetý maqsatynda oblystan Astanaǵa arnaıy daıyndalǵan 30 aty ákelindi.
Al, ótken demalys kúnderi Astana jurtshylyǵynyń nazaryna «Ata babalar murasy» degen atpen arheologııalyq jádigerler kórmesi usynylǵan bolatyn.
Shyǵysqazaqstandyqtar kórmege Qazaqstannyń belgili ǵalymdary - Zeınolla Samashev, Ábdesh Tólebaev, Karl Baıpaqovtyń sońǵy eki jyldaǵy eńbekterin ákeldi.
Olardyń barlyǵy oblystyq bıýdjetten 2 jylda 200 mln teńge bólingen úshjyldyq arheologııalyq baǵdarlama aıasynda jumys isteıdi. Uıymdastyrýshylar ShQO kúnderiniń eń mazmundy tusy - Astanada birneshe kún boıy ótkizilip jatqan «Rodnoı zemlı - mnogogolose» fotokórmesi ekendigin aıtady.
Buǵan deıin habarlanǵandaı, 25 shilde kúni «EKSPO-2017» kórmesi aýmaǵyndaǵy «Amfıteatrda» Shyǵys Qazaqstan oblysynan shyqqan belgili estarada juldyzdarynyń qatysýymen «Nurly Shyǵystan - nurly álemge nur shashý» atty gala-kontsert ótkiziledi. Olardyń qatarynda Qazaqstannyń halyq ártisi Roza Rymbaeva da bar.
