Astanada Shyńǵys Aıtmatovtyń murasy men túrki halyqtarynyń ádebı baılanystary talqylandy

ASTANA. KAZINFORM — Astanada Shyńǵys Aıtmatovtyń shyǵarmashylyq murasy men túrki halyqtary ádebıetiniń ózara yqpaldastyǵy talqylandy. Halyqaralyq túrki akademııasynda ótken konferentsııada qyrǵyz ádebıettanýshysy, akademık Abdyldajan Aqmatálıevtiń 70 jyldyq mereıtoıy da atalyp ótti.

Astanada Shyńǵys Aıtmatovtyń murasy men túrki halyqtarynyń ádebı baılanystary talqylandy
Foto: Halyqaralyq túrki akademııasy

«Shyńǵys Aıtmatov jáne túrki halyqtarynyń ádebı baılanystary» konferentsııasyn Halyqaralyq túrki akademııasy men Qyrǵyzstan Ulttyq ǵylym akademııasynyń Shyńǵys Aıtmatov atyndaǵy Ádebıet ınstıtýty birlesip uıymdastyrdy.

Konferentsııaǵa Qazaqstan men Qyrǵyzstannyń belgili ǵalymdary, jazýshylary, ádebıettanýshylary jáne zııaly qaýym ókilderi qatysty. Olar túrki halyqtaryna ortaq ádebı murany zertteý, qazaq-qyrǵyz ádebı baılanystaryn damytý jáne Shyńǵys Aıtmatov shyǵarmashylyǵynyń túrki álemindegi orny jóninde pikir almasty.

Astanada Shyńǵys Aıtmatovtyń murasy men túrki halyqtarynyń ádebı baılanystary talqylandy
Foto: Halyqaralyq túrki akademııasy

Jıyndy ashqan Halyqaralyq túrki akademııasynyń vıtse-prezıdenti Ashat Kesikbaev ortaq tarıhı jadyǵa, mádenı dástúrler men rýhanı qundylyqtarǵa negizdelgen qazaq-qyrǵyz ádebı baılanystaryn zertteý — qazirgi túrkologııalyq izdenisterdiń mańyzdy baǵyttarynyń biri ekenin atap ótti.

Konferentsııa jumysyna QR Prezıdentiniń keńesshisi Baýyrjan Omarov, Quryltaı depýtaty Janarbek Áshimjan, Qyrǵyz Respýblıkasynyń halyq jazýshysy Qaırat Imanalıev, Shyńǵys Aıtmatov atyndaǵy Ádebıet ınstıtýtynyń dırektory jáne mereıtoı ıesi Abdyldajan Aqmatálıev, Qyrǵyz Respýblıkasynyń Qazaqstandaǵy Elshiliginiń dıplomattary, eki eldiń zertteýshileri men ádebıet ókilderi qatysty.

Astanada Shyńǵys Aıtmatovtyń murasy men túrki halyqtarynyń ádebı baılanystary talqylandy
Foto: Halyqaralyq túrki akademııasy

Abdyldajan Aqmatálıevtiń mereıtoıyna oraı Qazaqstan basshylyǵy atynan quttyqtaýlar joldandy. Baýyrjan Omarov Qazaqstan Vıtse-Prezıdenti Erlan Qarınniń quttyqtaý hatyn oqyp berdi. Ulytaý oblysynyń ákimi Eset Baıkenniń quttyqtaýyn memleket jáne qoǵam qaıratkeri Muhambet Kópeev jetkizdi.

Konferentsııa aıasynda akademık Abdyldajan Aqmatálıevtiń Túrki akademııasyna syıǵa tartqan kitaptarynyń kórmesi uıymdastyryldy. Ekspozıtsııaǵa ǵalymnyń qyrǵyz ádebıetine, Shyńǵys Aıtmatov shyǵarmashylyǵyna jáne túrki halyqtarynyń ádebı baılanystaryna arnalǵan ǵylymı eńbekteri men ádebıettanýshylyq zertteýleri qoıyldy.

Astanada Shyńǵys Aıtmatovtyń murasy men túrki halyqtarynyń ádebı baılanystary talqylandy
Foto: Halyqaralyq túrki akademııasy

Qatysýshylar Abdyldajan Aqmatálıevtiń ǵylymı murasy men zertteýshilik qyzmetine de erekshe nazar aýdardy. Ol túrki álemi ádebıeti men Shyńǵys Aıtmatov shyǵarmashylyǵyn zertteýge eleýli úles qosqan ǵalymdardyń biri.

Mádenı baǵdarlama aıasynda manasshy Azız Bıımyrza ýýlý qyrǵyz halqynyń «Manas» eposynan úzindiler oryndady. Sondaı-aq qyrǵyzdyń tókpe aqyny Nursultan Maldybaev eki halyqqa ortaq aýyzsha poezııa óneriniń dástúrin jalǵastyrǵan shyǵarmashylyq ónerin usyndy.

Buǵan deıin Alash murasyn túrki álemine tanytyp júrgen ázerbaıjandyq ǵalym Álı Shamılogly týraly jazǵan edik.