Astanada shildeniń alǵashqy 13 kúninde 11 bala kópqabatty úıdiń terezesinen qulaǵan
ASTANA. QazAqparat - Astanada kópqabatty úılerdiń terezesinen balalar kúnara qulaıdy. Barlyq jaǵdaı úlkenderdiń salǵyrttyǵynyń saldarynan oryn alady, dep habarlaıdy elorda ákimdiginiń medıa ortalyǵy.
Bul statıstıkany elordalyq dárigerler málimdedi: shilde aıynyń on úsh kúninde 11 bala kópqabatty úıdiń terezesinen qulaǵan. Zardap shekkender - 1-4 jas aralyǵyndaǵy búldirshinder.
«Balalar túrli súıek jaraqaty, bas súıegi men ishki organdary zaqymdanǵan óte aýyr jaǵdaıda jetkizildi», - dedi medıa ortalyqtyń tilshisine bergen suhbatynda №2 qalalyq balalar aýrýhanasynyń travmatologııa bóliminiń meńgerýshisi Baımahan Sadýov.
Aıta keterligi, terezeden qulaǵan balalardyń barlyǵy úılerinde úlkendermen birge bolǵan.
«Tipti, balalar úılerinde úlkendermen birge bolǵan kezde qulap ketip, al ata-analary bul týraly bilmegen jaǵdaılar kezdesti. Úıdegi balanyń qulaǵanyn kórshilerinen estigen», - dedi ol.
Mysaly, 2 shildede Astanaǵa týystarynyń úıine qonaqqa kelgen tórt jastaǵy bala 8-shi qabattan qulap, abyroı bolǵanda aman qaldy. Balany kórshileri kórip, jedel járdem shaqyrǵan. Týystary bolsa birer mınýt qaraýsyz qaldyrǵandaryn aıtyp aqtaldy.
Oqıǵa oryn alǵan kezde balanyń anasy Pavlodar oblysynda bolǵan.
«Terezede moskıttik tor bar bolsa da, balkon ashyq turǵan kezde balalardy baqylaýsyz qaldyrmaý kerek. Mundaı sumdyqty basymnan ótkerdim, tipti dushpanymnyń basyna bermesin», - deıdi balanyń anasy.
Osy oraıda dárigerler balalardyń terezeden qulaýyna jol bergen úlkender men ata-analarǵa jazany kúsheıtý kerek dep esepteıdi.
«Qoldanystaǵy zańnamaǵa sáıkes, mundaı jaǵdaıda úlkender jaýapkershilikke tartylmaıdy. Alaıda balalarǵa durys qaramaǵan ata-analardyń jaýapkershiligin zań júzinde qoldanysqa engizse degen tilegimiz bar. Sol kezde balaǵa bas-kóz bolyp, salǵyrt qaramaıtyn bolady. Balanyń qulaǵany durys emes», - dedi óz sózinde B.Sadýov.
Resmı derekke sáıkes, 2015 jyldyń alty aıynda Astanada kóp qabatty úıdiń terezesinen 18 balanyń qulaý faktisi tirkelse, 2017 jyldyń qańtar-maýsym aılarynda mundaı qyryqqa jýyq oqıǵa tirkeldi.
Onyń 29 jaǵdaıynda balalar terezeden qulaǵan.
