Astanada shilde aıynda sýda 15 qaıǵyly oqıǵa oryn aldy
ASTANA. 26 shilde. QazAqparat - Sýǵa túsý maýsymy bastalǵan kúnnen-aq, qutqarýshylardyń da jumysy kóbeıdi. Azamattardyń nemquraıly áreketteri, qarapaıym qaýipsizdik sharalaryn saqtamaýy tótenshe jaǵdaıdardyń týyndaýyna sebep bolady. Maýsymnyń 1-i men shildeniń 26-sy aralyǵynda Astana qalasy boıynsha sýda 15 qaıǵyly oqıǵa oryn aldy. Bul týraly astana.kz saıtyna elordalyq TJD habarlady.
Vedomstvonyń habarlaýynsha, qaza bolǵandar - ishimdik ishken 14-31 jastaǵy azamattar.
«Qutqarý sharalary árdaıym ońaıǵa túspeıtini de aıan. Ásirese, tótenshe jaǵdaıdyń qatysýshylary, qutqarýshylarǵa kesh qońyraý shalǵan jaǵdaıda. Atalǵan merzimde tórt qaıǵyly jaǵdaı tirkeldi» dep habarlady baspasóz qyzmetinen.
9 shildede Kóktal-1 aýdanynda alkogoldik ishimdik ishken 20 jasar Ózbekstan azamaty sýǵa ketken. «Aşy sýǵa» sylqııa toıǵan azamattyń sýǵa ketýine býyndary tartylyp qalýy sebep bolǵan. Sondaı-aq, 12 shildede sýda qutqarý qyzmetkerleri oqıǵa ornyna kelip jetkende demalyp júrgen adamdar mert bolǵan azamattyń denesin sýdan alyp shyqqan. Qarttar úıiniń aýdanynda, 14 shilde kúni sýdyń betine qalqyp shyqqan er adamnyń máıiti tabyldy. Sońǵy qaıǵyly jaǵdaı 24 shildede tirkeldi. 24 jastaǵy jigit mas kúıinde tyıym salynǵan jerde shomylyp, sýǵa batyp ketken.
Degenmen, qutqarýshylar ólimnen ondaǵan adamnyń ómirin arashalaǵan.
«Sýda qutqarý qyzmeti jumyskerleri 14 adamdy, sonyń ishinde 2 balany qutqardy. 4 adam - basqa qalanyń turǵyndary; olardyń biri jaıaý júrginshiler kópirinen sekirgen; 14 jastaǵy eki er bala men 12 jasar bir qyz. Olar jaǵajaıda úlkenderdiń qaraýynsyz sýǵa túsip júrgen. Astana qalasy TJD SQQ mamandary olarǵa medıtsınalyq jáne psıhologııalyq kómek kórsetti» delingen vedomstvo aqparatynda.
