Astanada sheteldikter jyl basynan beri 70 qylmys jasaǵan

ASTANA. KAZINFORM – Jyl basynan beri elordadaǵy shetel azamattary 70 qylmys jasaǵan. Bul týraly qalalyq máslıhattyń kezekti sessııasynda Astana qalasy polıtsııa departamentiniń bastyǵy Marat Tólebaev málimdedi. 

– Qylmystyq ahýalǵa kóshi-qon úderisteri de óz áserin tıgizip jatyr. Jyl basynan beri elordaǵa 24,5 myń shetel azamaty keldi, olardyń 90 paıyzy – jumys isteý maqsatynda. Sonymen qatar 605 qandas azamattyq aldy. Biz qurylys nysandarynda jáne bazarlarda eńbek etetin sheteldikterdiń júris-turysyn baqylaýda ustap otyrmyz, - dedi M.Tólebaev.

Polıtsııa málimetinshe, sheteldikterdiń qatysýymen 70 qylmys tirkelip, olar boıynsha 84 qylmystyq is qozǵalǵan. Ákimshilik quqyq buzýshylyq jasaǵany úshin 20 myńnan astam shetel azamaty men 141 jumys berýshi jaýapkershilikke tartyldy. 250-den astam sheteldiktiń elde bolý merzimi qysqartylyp, 603 shetel azamaty elden shyǵaryldy.

– Elordadaǵy joǵary ómir súrý deńgeıi elimizdiń ózge óńirlerinen kelgen azamattardy da tartady. Alaıda, ókinishke qaraı, olardyń bir bóligi túrli quqyq buzýshylyqtarǵa jol berýde. Bıyl basqa qalalardan kelgen 848 azamat qylmys jasaǵan, olardyń 30 paıyzy qylmystyq jaýapkershilikke tartyldy, - dedi departament basshysy.

Spıkerdiń aıtýynsha, polıtsııa qoǵamda qylmysqa múldem tózbeýshilik qaǵıdasyn qalyptastyrý boıynsha jumysty jalǵastyryp jatyr. Jyl basynan beri 773 myń ákimshilik quqyq buzýshylyq anyqtalyp, 9 mıllıard teńgeden astam aıyppul salynǵan. 

Vandalızmge qarsy is-sharalar aıasynda kommýnaldyq múlikti búldirgen nemese joıǵan 100-den astam adam jaýapqa tartylǵan. Olardyń 61-i ákimshilik qamaqqa alynǵan, 99 adamǵa jalpy somasy 6 mıllıon teńgeden astam aıyppul salynǵan. «Taza Qazaqstan» aktsııasy aıasynda 60 myńnan astam adamǵa aıyppul jazylǵan.

Eske sala keteıik, Túrkistan oblysynda kolledj stýdentin óltirý kúdigimen sheteldik ustalǵanyn jazǵanbyz.