Astanada sheteldik azamat bir kúnde birneshe quqyqbuzýshylyq jasady

ASTANA. KAZINFORM – Astanada sheteldik azamat zańsyz taksı qyzmetimen aınalysyp, birneshe jol-kólik oqıǵasyna sebepker boldy. Onyń Qazaqstanda zańsyz júrgeni anyqtaldy, dep habarlaıdy Polisia.kz.

Túnde patrýl kezinde polıtseılerdiń nazaryn Mercedes avtokóliginiń júrgizýshisi aýdarǵan. Ol patrýldik mashınany kórgen soń, jedel burylyp, jasyrynýǵa tyrysqan. Alaıda kólik jolyndaǵy shlagbaýmdy buzyp ótip, turaqtaǵy eki avtokólikke soqtyǵysqan. Onyń biri ınertsııamen taǵy bir kólikti zaqymdaǵan.

Júrgizýshi jaıaý qashýǵa árekettengenimen, tártip saqshylary ustap úlgergen.

Tekserý barysynda er adamnyń sheteldik ekeni, elde zańsyz júrgeni jáne taksı qyzmetin zańsyz atqaryp kelgeni belgili boldy. Sonymen qatar polıtsııa birneshe quqyqbuzýshylyqty anyqtady:

• kólikti jalǵan memlekettik tirkeý nómirlerimen basqarǵan;

• taksı qyzmetin kóshi-qon qujattarynsyz jáne ruqsatsyz júzege asyrǵan;

• saqtandyrý polısi joq avtokólikti basqarǵan.

Sonymen birge kólik nómirleriniń basqa avtokólikke tıesili ekeni, kúdiktiniń ony bóten kólikten sheship alǵany belgili boldy.

Sot sheshimimen quqyqbuzýshy úsh táýlikke qamaýǵa alyndy jáne kóshi-qon zańnamasyn buzǵany úshin jaýapkershilikke tartyldy.

«Mundaı zańsyz áreketter joldaǵy qaýipsizdikke tikeleı qater tóndiredi. Qaýipti quqyqbuzýshy zańǵa baǵynbaǵan jaǵdaıda qatań jazalanady. Ásirese, kólikti jalǵan nómirlermen basqarý, polıtsııadan qashý jáne zańsyz qyzmet kórsetý aınaladaǵy adamdardyń ómiri men densaýlyǵyna qaýip tóndiredi», – dep eskertti elordalyq polıtseıler.

Aıta keteıik, Almaty oblysynda kólikpen adamdardy ádeıi basyp ketken kúdiktiler ustaldy.