Astanada sheteldikter zeınetkerdi devalvatsııamen qorqytyp, tonap ketti
ASTANA. QazAqparat - Astanalyq polıtseıler 78 jastaǵy qala turǵynyn alaıaqtyqpen tonady degen kúdikpen bir top adamdy ustady, dep habarlaıdy QazAqparat Astana ІІD baspasóz qyzmetine silteme jasap.
Saryarqa aýdandyq ІІB qyzmetkerleri bir top Ózbekstan Respýblıkasynyń azamatyn ustady.
3 adamnan (eki áıel, bir er adam) quralǵan qylmystyq top alaıaqtyqpen ájeıdiń aqshasyn sypyryp ketken.
Polıtseılerdiń aıtýynsha, kúdiktiler kóshede ájeni kezdestirip, oǵan aldaǵy ýaqytta devalvatsııa bolatynyn, ol jınaǵan aqshasyna qatty áser etetinine sendiredi de, «sıtýatsııadan shyǵatyn» joldy usynady. Banktiń dıskont kartasyn alýdy jeleý etip, zeınetkerdiń jınap otyrǵan 270 myń teńgesin jymqyrady.
Qazirgi kezde kúdiktiler kinásin moıyndady. Polıtsııanyń aqparatyna qaraǵanda, olar bıyl qyrkúıek aıynyń basynda ǵana Astanaǵa kelip, páter jaldap turǵan.
Kúdiktiler Astana ІІD ýaqytsha ustaý ızolıatoryna qamaldy. Osy derek boıynsha, QR Qylmystyq kodeksiniń 190-babymen (Alaıaqtyq) sotqa deıingi tergep-tekserý bastaldy.
Astana polıtseıleri turǵyndardy saq bolýdy, alaıaqtardyń arbaýyna túspeýge shaqyrady. Sondaı-aq osy kúdiktilerdiń alaıaqtyq áreketterinen jábirlengenderdi Saryarqa aýdandyq Іshki ister basqarmasyna (Aqbuǵa kóshesi, 2) júginýge; 8 (7172) 71-66-10, 71-66-40 nemese 102 nómirine qońyraý shalýǵa shaqyrady.
