Astanada sheteldik óner juldyzdarynyń kontsertine arnalǵan bıletter satylýda
ASTANA. 13 maýsym. QazAqparat - 12 maýsymnan bastap Astananyń 14 jyldyǵyn merekeleý aıasynda ótetin Sergeı Makovetskııdiń shyǵarmashylyq kontserti men qazaqstandyq jáne sheteldik juldyzdardyń bı keshine arnalǵan bıletter satylymǵa tústi,
dep habarlaıdy astanaday.kz saıty.
Reseı halyq ártisi Sergeı Makovetskııdiń shyǵarmashylyq keshi 6 shilde saǵat 18.30-da Kongress-Holl saraıynda ótedi. Astanaǵa ártis alǵash ret kelgeli otyr. Makovetskııdiń shyǵarmashylyq keshi Qazaqstan astanasy turǵyndaryna tamasha tartý bolary sózsiz. Barshaǵa onyń «12», «72 metra», «Jmýrkı» jáne ózge de fılmderdegi rólderi belgili. Bul shyǵarmashylyq kezdesý jas ártister úshin sheberlik -saǵaty, al ártistiń tabynýshylary úshin syrly kesh bolary anyq.
Dál osy kúni, 6 shilde saǵat 19.00-de «Saryarqa» respýblıkalyq velotreginde otandyq jáne sheteldik estrada juldyzdarynyń kontserti ótedi. Bul kúni astanalyqtardy qazaqstandyq, reseılik jáne shet elder estrada juldyzdary quttyqtaıdy. Olar: Erbolat, Metiss', Maqpal Isabekova, «Orda», Nıýsha, Tımatı, GeeGun, Ivan Dorn, «Serebro», Dan Balan, Kelly Rowland.
Bıletterdi «Qazaqstan» ortalyq kontsert zalynda, «Kerýen» saýda ortalyǵynda, «Azııa park» jáne «Mega», «Jastar» saraıy, Kongress-Holl, sondaı-aq «Meloman» dúkender jelisi men Astana halyqaralyq áýejaıynyń kassalarynan alýǵa bolady. Sonymen qatar, bıletterdi www.biletiastana.kz, www.zakazbiletov.kz, www.meloman.kz. saıttarynan tapsyrys berý arqyly alýǵa bolady.
Astana kúni merekesi aıasynda ótetin sharalarǵa bılet quny 500 teńgeden bastalady.
