Astanada sheteldik kompanııanyń senimine kirip, 12 mln. dollardy úptep ketken alaıaqtar sottaldy
ASTANA. QazAqparat - Astana qalasy Almaty aýdanynyń №2 soty alaıaqtyq jasaǵan eki azamattyń birin 7 jylǵa, ekinshisin 4 jylǵa bas bostandyǵynan aıyryp, múlikterin tárkileý týraly úkim shyǵardy. Bul týraly qalalyq proýratýranyń baspasóz qyzmetinen habarlandy.
«Azamat P. men I. alaıaqtyqpen aldaý maqsatynda ózara sóz baılasyp, óndirýshi zaýyttan mys jetkizý týraly jalǵan aqparatty taratqan. Odan ári, azamat P. tústi metaldardy jetkizý salasynda qyzmet etetin kommertsııalyq kásiporynnyń jalǵan dırektory bolyp shyǵa keledi de, I satyp alýshylardy izdeý boıynsha deldal bolyp, ol óziniń tanysy Ońtústik Koreıa azamatyna tómen baǵamen mys satatyndyǵyn habarlaǵan. Al Ońtústik Koreıalyq azamat álgilerdiń qylmystyq pıǵyyna kúdiktenbeı Fın kompanııasynyń ókilimen tanystyrǵan. Keıinnen azamat P. seriktestik dırektory retinde fın kompanııasymen 80 mln. AQSh dollaryna katod mysyn jetkizýge kelisimshart jasasyp, sheteldik satyp alýshyny óz áreketteriniń zańdylyǵyna sendirip, jasandy jalǵan kepil hatyn jasaǵan», - delingen baspasóz baıanynda. Keıinnen, jalǵan kepil hatyn alǵan sheteldik kompanııa alaıaqtardyń shotyna 12 mln. AQSh dollaryn aýdara salǵan.
Al qylmyskerler álgi aqshany óz qajettilikterine jumsap, avtokólikter men jer ýchaskelerin satyp alady. Degenmen, alaıaqtar kóp uzamaı quryqtalyp, olardyń múlki tárkilenip, ózderi bostandyǵynan aıyryldy.
