Astanada sheteldik qandastarymyzǵa arnalǵan «Altyn qazyq» til úıretý oqý-ádistemelik kesheniniń tanystyrylymy ótti
ASTANA. Qazannyń 27-si. QazAqparat /Aıdar Ospanalıev/ - Búgin Astanada ótken «Til úıretý ortalyqtary qyzmetkerleriniń biliktiligin jetildirý» atty respýblıkalyq ǵylymı-tájirıbelik konferentsııa barysynda sheteldik qandastarymyzǵa arnalǵan «Altyn qazyq» til úıretý oqý-ádistemelik kesheniniń tanystyrylymy ótti.
Jıyn barysynda atalmysh keshenniń qyzmetimen tanystyrǵan Sh.Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵy dırektorynyń orynbasary Nesibeli Qurmannyń aıtýynsha, atalmysh júıe Eýropa elderinde turatyn qazaqtarǵa arnalǵan. «Bizde qazir Qytaı, Mońǵolııa sııaqty elderde turatyn qazaqtarǵa da arnalǵan til úıretý kesheni bar. Biz bul keshenderdiń ár eldiń jazý úlgilerine baılanysty daıyndadyq. Sonymen qatar qazir TMD memleketterinde turatyn qandastyrymyzǵa da arnalǵan tildi oqytý júıeleri bar. Júıeni daıyndaý isinde ásirese etnolıngvopsıhologııalyq, etnolıngvodıdaktıkalyq sıpattardyń nazarǵa alynǵandyǵyn eskere ketý kerek. Bul ár aımaqtyń azamattarynyń ózindik erekshelikterin eskerýge múmkindik beredi», - dedi dırektordyń orynbasary.
Onyń aıtýynsha, «Altyn qazyq» shet memleketterde júrgen júzdegen, myńdaǵan qandastarymyzǵa til úıretip, ózderiniń elderine oralýlaryna negiz bolatyn dúnıe bolsa eken degen nıetten týyndap otyr.
