Astanada shertpe kúıshige arnalǵan «Qońyr» atty kúı keshi ótedi
ASTANA. QazAqparat - 27 qarasha kúni elordadaǵy Qazaq ulttyq óner ýnıversıtetiniń Jambyl atyndaǵy kontserttik zalynda Qazaqstannyń eńbek sińirgen ártisi, shertpe kúıdiń sheberi Ábiken Hasenovtiń týǵanyna 125 jyl tolýyna arnalǵan «Qońyr» atty kúı keshi ótedi, dep habarlaıdy elorda.info .
Ábiken Hasenov - qazaqtyń shertpe kúı óneriniń kásibı mektebiniń irgetasyn qalaǵan uly kúıshi. Onyń «Qońyr» atty kúıi ózi ómir súrgen tar kezeńniń aýyrtpashylyǵyn sýretteıdi. 1934 jyldan bastap Qazaq akademııalyq drama teatrynyń akteri bolyp eńbek etken. Kóptegen obrazdardy somdaǵan teatr tarlany retinde aty tarıhta qalǵan. Ábiken Hasenov Táttimbet, Itaıaq, Maqash, Sembek, Qyzdarbek, Ábdı sııaqty halyq kúıshileriniń muralaryn kúıtabaqqa jazyp qaldyrǵan.
Shertpe kúıdiń maıtalman sheberin S.Seıfýllın, S.Muqanov, Ǵ.Músirepov, Ǵ.Mustafın syndy klassık qalamgerler súıip tyńdaǵan. Ábikenniń esimi A.Jubanovtyń monografııasynda atalǵan.
«Qazaqtyń uly kúıshileriniń biri, Táttimbet mektebiniń ozyq ókili Ábiken Hasenovtiń ómir súrgen kezeńi zar zaman emes, ker zaman boldy. Almatyǵa Ábiken Sáken Seıfýllındi saǵalap barady. Sáken Ábikendi jaqsy qarsy alyp, qamqor bolyp, ony jańadan ashylǵan Qazaq drama teatryna ártistik qyzmetke ornalastyrady. Ábiken osy teatrda ómiriniń sońyna deıin qyzmet etti. Bul saladaǵy eńbegi elenip, memlekettik marapattar da aldy. Qazaqtyń teatr óneriniń irgetasyn qalaǵan aǵa býyn ókilderiniń arasynda Ábiken Hasenovtiń esimi de qurmetpen atalady. Onyń akterlik sheberliginiń teatrtanýshylar tarapynan aıtylmaı qalǵan kezi joq. Teatrda qyzmette júrgende Ábikenniń alapat kúıshiligi Almatyǵa jaıyldy» deıdi osy keshti uıymdastyrýshy, belgili kúıshi, QR eńbek sińirgen qaıratkeri Janǵalı Júzbaı.
Al Astanada ótetin kúı keshine Astana men Qaraǵandy qalalarynan birqatar belgili kúıshiler men ánshiler qatysady. Atap aıtsaq, Qalken Qasymov, «Kúı-kerýen» shertpe kúı ortalyǵynyń basshysy Qaırolla Sádýaqasov, Qapash Qulysheva, Seken Turysbek, Rymhan Ábilhanuly, Edil Basyǵaraev, Qaırat Aıtbaev, t.b. ónerpazdar kúı shertip, án salady.
