Astanada ishek ınfektsııalarymen syrqattaný kórsetkishi 10%-ǵa tómendedi
ASTANA. KAZINFORM — Astanada bıyl alǵashqy bes aı ishinde jedel ishek ınfektsııasyna qatysty 797 jaǵdaıy tirkeldi. Bul ótken jyldyń osy kezeńimen salystyrǵanda 9,7%-ǵa az. Bul týraly Astana qalasynyń sanıtarııalyq-epıdemıologııalyq baqylaý departamenti basshysynyń orynbasary Janna Pirálıeva málimdedi.
Vedomstvo málimetinshe, syrqattanýshylyqtyń qarqyndy kórsetkishi 100 myń turǵynǵa shaqqanda 50,59 bolǵan. Ótken jyly bul kórsetkish 56,03 bolǵan edi. Soǵan qaramastan elordadaǵy kórsetkish respýblıkalyq ortasha deńgeıden 2,3 ese joǵary.
— Aýrýǵa shaldyqqandardyń basym bóligi — 14 jasqa deıingi balalar. Bul sanatta 538 jaǵdaı tirkelip, jalpy kórsetkishtiń 67,5%-yn alyp otyr. Іshek ınfektsııalary kóbine bir jastan eki jasqa deıingi jáne úsh jastan alty jasqa deıingi balalar arasynda anyqtaldy, — dedi Janna Pirálıeva.
Tirkelgen jaǵdaılardyń ishinde naqtylanǵan jedel ishek ınfektsııalary basym. Jyl basynan beri osy aýrýmen 592 jaǵdaı tirkelgen. Bul jalpy kórsetkishtiń — 74,2%-y. Al etıologııasy anyqtalmaǵan 202 jaǵdaı tirkelse, bakterııalyq dızenterııanyń úsh jaǵdaıy anyqtalǵan.
Janna Pirálıevanyń aıtýynsha, ınfektsııalar ádettegideı taǵam men turmystyq baılanys arqyly juǵyp otyr. Taǵam arqyly juqtyrýdyń 361 jaǵdaıy, turmystyq baılanys arqyly juqtyrýdyń 98 jaǵdaıy tirkelgen. Al 338 jaǵdaıda juqtyrý kózi anyqtalmaǵan.
Epıdemııaǵa qarsy sharalar aıasynda mamandar sý quramyndaǵy patogendi mıkroflorany anyqtaý úshin 34 synamaǵa zertteý júrgizdi. Nátıjesinde qaýipti mıkroorganızmder anyqtalǵan joq. Al zerttelgen 12 taǵam óniminiń jeti úlgisinen sanıtarııalyq talaptarǵa sáıkes kelmeıtin zań buzý anyqtalǵan.
Esepti kezeńde elordanyń ınfektsııalyq statsıonarlaryna 652 adam jatqyzyldy. Jedel ishek ınfektsııalarynan qaıtys bolý derekteri tirkelmegen.
Sanıtarııalyq-epıdemıologııalyq baqylaý departamenti ishek ınfektsııalarynyń aldyn alý úshin jeke bas gıgıenasyn saqtaý, qaýipsiz aýyzsý paıdalaný, kókónister men jemisterdi muqııat jýý jáne taǵamdardy jetkilikti deńgeıde termııalyq óńdeýden ótkizý qajettigin eske salady.
Eske sala keteıik, Gabon men Vetnamǵa baryp kelgen almatylyqtardan bezgek aýrýy anyqtaldy.
