Astanada «Shegeniń» jeke kórmesi ashyldy

V. Gvozdev Reseıde dúnıege kelgen. Keıin ata-analarymen birge Qazaqstanǵa kóship keledi de, osy jerde ekinshi Otanyn tabady. Sýretshiniń aıtýynsha, ony kóshpendilerdiń kóne tarıhy men ózindik dúnıetanymy qatty baýrap alǵan. Shege degen laqap atpen belgili óner ıesi qazaq ornamentteriniń qupııasyn sheship qana qoımaı, petroglıfterdi de ońaı oqı alady.

 Qylqalam sheberiniń sózine qaraǵanda, ol kórme ekspozıtsııasyna óziniń eń úzdik 50-ge jýyq dúnıelerin alyp kelgen. Onyń ishinde 33 kartına áli boıaýy keppegen jańa týyndylar.

 Qazaqstandyq synshylardyń pikirinshe, «Shegeni» tabıǵattyń ásem beınesi shabyttandyratynyn anyqtaý qıyn emes, ol taýlardy, ózenderdi, aǵashtar men tal japyrqtaryn, gúlderdi jıi salady. Shege beıneleıtin obrazdar sımvoldar deńgeıine deıin kóterilip, qorshaǵan ortany meńzeýden góri, kóbine-kóp syryn ishine búkken tylsym da tereń oıdy bildiredi.

Almatyda Júrgenov atyndaǵy qazaq ultyq óner ınstıtýtyn támamdaǵan sýretshi ózine tán stıldi «etnosımvolızm» dep ataıdy. Onyń negizi  qazaqtyń dástúrli óneri dep biledi. Sebebi ol salǵan kartınalardyń basty elementi - kóne zamanda aqparat almasý úshin paıdalanylǵan jáne óz boıyna mańyzdy maǵynany jınaǵan nyshandar men sımvoldar.

 V. Gvozdevtiń jeke kórmeleri Túrkııada, Germanııada jáne Qazaqstanda ótkizilgen. Onyń týyndylary Avstralııada, AQSh-ta, Avstrııada, Germanııada, Danııada, Frantsııada, Anglııada, Vengrııada, Polshada, Gollandııada, Túrkııada, Shveıtsarııada, Reseıde jáne Qazaqstanda jeke kollektsııalarda saqtaýly.